Ihe dị ka ọnwa abụọ ndị Izrel hapụchara Ijipt, ha rutere n’Ugwu Saịnaị ma maa ụlọikwuu ha n’ebe ahụ. Jehova gwara Mozis ka ọ gbagote n’ugwu ahụ. Mgbe Mozis gbagotere, ọ gwara ya, sị: ‘M napụtara ndị Izrel. Ọ bụrụ na ha erubere m isi ma debe iwu m, ha ga-abụrụ m ndị pụrụ iche.’ Mozis laghachiri n’ebe ndị Izrel nọ ma kọọrọ ha ihe Jehova kwuru. Olee ihe ndị Izrel kwuru mgbe Mozis gwachara ha ihe a? Ha kwuru, sị: ‘Anyị ga-eme ihe niile Jehova gwara anyị mee.’

Mozis laghachiri n’ugwu ahụ ọzọ. Jehova gwaziri ya, sị: ‘N’ime ụbọchị atọ, m ga-agwa gị okwu. Gwa ndi Izrel ka ha ghara ịbịaru Ugwu Saịnaị nso.’ Mozis gakwuuru ndị Izrel ma gwa ha ka ha dịrị njikere ịnụ ihe Jehova ga-agwa ha.

Mgbe ụbọchị atọ gachara, ndị Izrel hụrụ àmụ̀mà na oké ígwé ojii n’ugwu ahụ. Ha nụkwara ụda oké égbè eluigwe na ụda opi na-adasi ike. Jehova jizi ọkụ gbadata n’ugwu ahụ. Ezigbo ụjọ tụwara ndị Izrel nke na ha mawara jijiji. Ugwu ahụ niile nọ na-akwụ anwụrụ ọkụ ma na-ama jijiji. Ụda opi ahụ na-adasikwa ụda ike. Chineke gwaziri ha, sị: ‘Abụ m Jehova. Unu efela chi ọzọ.’

Mozis gaghachiri n’ugwu ahụ, Jehova enyekwa ya iwu ọ ga-enye ndị Izrel gbasara otú ha kwesịrị isi na-efe ya na otú ha kwesịrị isi na-akpa àgwà. Mozis dere iwu ndị ahụ n’akwụkwọ ma gụọrọ ha ndị Izrel. Ha kwere nkwa, sị: ‘Anyị ga-eme ihe niile Jehova gwara anyị mee.’ Ndị Izrel ekwelanụ Chineke nkwa. Ma, hà ga-emezunụ ya?