Nọ emọ Izrẹl a no Ijipti te oware wọhọ emerae ivẹ no, a tẹ te nyate Ugbehru Saena je wo họ etẹe. Jihova o te se Mosis kpobọ ugbehru na jẹ ta kẹe nọ: ‘Mẹ họ ọnọ o siwi emọ Izrẹl. A te yoẹme kẹ omẹ je koko izi mẹ, a te jọ ahwo obọdẹ kẹ omẹ.’ Nọ Mosis o nwrotọ no ugbehru na ze, ọ tẹ vuẹ emọ Izrẹl ẹme nọ Jihova ọ ta. Kọ ẹvẹ emọ Izrẹl a ta? A ta nọ: ‘Oware kpobi nọ Jihova ọ ta nọ ma ru ma ti ru.’

Mosis ọ tẹ wariẹ zihe kpobọ ugbehru na. Jihova ọ tẹ ta kẹe nọ: ‘Edẹ esa e tẹ vrẹ no, mẹ te ta ẹme kẹ owhai kpobi. Vẹvẹ ahwo na kpobi unu nọ a du gadiẹ Ugbehru Saena na ha.’ Mosis o te nwrotọ nyae vuẹ emọ Izrẹl re a ruẹrẹ oma kpahe kẹ ẹme nọ Jihova ọ gwọlọ ta.

Nọ edẹ esa e vrẹ no, emọ Izrẹl a tẹ ruẹ elo egbrara, gbe ehru nọ o bi evaọ ugbehru na. A te je yo edo egbrara nọ o bi do gaga gbe edo ọgba. Kẹsena Jihova o te nwrotọ ziọ ugbehru na avọ oma erae. Ozọ u te mu emọ Izrẹl gaga, yọ a bi nuhu. Iwiri e tẹ vọ ugbehru na kpobi, yọ ugbehru na u bi nuhu gaga. Edo ọgba na o te bi dhe ẹgẹga. Kẹsena Ọghẹnẹ ọ tẹ ta nọ: ‘Mẹ họ Jihova. Wha rẹ gọ eghẹnẹ efa siọ omẹ ba ha.’

Mosis ọ tẹ wariẹ gadiẹ zihe kpobọ ugbehru na. Jihova ọ tẹ jọ obei kẹe izi nọ ọ gwọlọ nọ emọ Izrẹl a koko kpahe oghẹrẹ nọ a rẹ gọe gbe oghẹrẹ nọ a re yeri uzuazọ. Mosis o te kere izi na je se ai kẹ emọ Izrẹl. A tẹ ya eyaa nọ: ‘Oware kpobi nọ Jihova ọ ta nọ ma ru ma ti ru.’ Whaọ a ya eyaa kẹ Ọghẹnẹ no, kọ a te sai koko iei?