Myei ta ĩlĩ kuma ana ma Aisilaeli mauma nthĩ ya Misili, nĩmavikie Kĩĩmanĩ kya Sinai na mamba maeema. Yeova nĩwamwĩtie Mose kĩĩmanĩ na amũtavya atĩĩ: ‘Nĩnatangĩĩie Aisilaeli. Mambĩwʼa na makwata mĩao yakwa, ngamatwʼĩkĩthya andũ makwa ma mwanya.’ Mose nĩwatheeie kuma kĩĩmanĩ na atavya Aisilaeli kyonthe kĩla Yeova wamũtavisye. Mo Aisilaeli masũngĩie ata? Maisye atĩĩ: ‘Nĩtũkwĩka kyonthe kĩla Yeova ũkũtwĩaĩa.’

Mose nĩwambatie ĩngĩ kĩĩmanĩ. E vau, Yeova amũtavisye-ĩ: ‘Mĩthenyanĩ ĩtatũ, nganeena naku. Nĩenda ũkanyʼe andũ maikatate kũthengeea Kĩĩma kya Sinai.’ Ĩtina wa ũu, Mose nĩwatheeie kuma kĩĩmanĩ na atavya Aisilaeli meyũmbanyʼe kwĩwʼa Yeova aineena namo.

Ĩtina wa mĩthenya ĩtatũ, Aisilaeli nĩmoonie ũtisi na ĩtu yiũ ĩũlũ wa kĩĩma. O na nĩmeewie wasya mũnene wa kĩtundumo na wasya wa soo. Na ĩndĩ Yeova atheea kĩĩmanĩ kuma ĩtunĩ e nthĩnĩ wa mwaki. Kavindanĩ kau, Aisilaeli nĩmakwatiwe nĩ wia na mambĩĩa kũtetema. Nakyo kĩĩma kyonthe kyambĩĩa kũthingitha mũno na kyavwʼĩkwa nĩ syũki. Nawʼo wasya wa soo waendeea kwingĩvĩĩa. Ĩtina wa maũndũ asu wasya wa Ngai nĩweewʼĩkie ũkyasya: ‘Ninyie Yeova. Na ndwaĩle kũthaitha ngai ingĩ.’

Mose nĩwasyokie ĩngĩ kĩĩmanĩ, na e kũu Yeova nĩwamũnengie mĩao atwaĩe andũ nĩ kana mamanye ũndũ maĩle kũmũthaitha Ngai na mwĩkalĩle ũla maĩle kwĩthĩwa nawʼo. Mose nĩwaandĩkie mĩao ĩsu na athi kũmĩsoma mbee wa Aisilaeli. Namo masya atĩĩ: ‘Nĩtũkwĩka kyonthe kĩla Yeova ũkũtwĩa twĩke.’ Nĩ wʼo, Aisilaeli nĩmamwathie Ngai kana makamwĩwʼaa. Ĩndĩ mo nĩmeanĩisye ũndũ ũsu?