GĨCUNJĨ KĨA 23
Kũrĩkanĩra na Jehova
Kĩndũ mĩeri ĩĩrĩ kuuma Aisiraeli moima Misiri, nĩ maakinyire Kĩrĩma-inĩ gĩa Sinai na makĩamba hema ho. Jehova nĩ eetire Musa aambate kĩrĩma-inĩ na akĩmwĩra: ‘Nĩ ndaahonokirie Aisiraeli. Manjathĩkĩra na mathikagĩrĩrie maathani makwa, megũtuĩka andũ akwa a mwanya.’ Musa nĩ aaikũrũkire kuuma kĩrĩma-inĩ na agĩthiĩ akĩmeera ũrĩa Jehova oigĩte. Meekire atĩa? Moigire: ‘Tũrĩkaga ũrĩa wothe Jehova atwĩra twĩke.’
Musa nĩ aacokire akĩambata kĩrĩma-inĩ rĩngĩ. Jehova aamwĩrire ũũ: ‘Thutha wa thikũ ithatũ nĩ ngwaria na Aisiraeli. Meere matikagerie kwambata Kĩrĩma-inĩ gĩa Sinai.’ Musa nĩ aaikũrũkire na akĩmeera mehaarĩrie nĩguo mathikĩrĩrie Jehova akĩmaarĩria.
Thutha wa thikũ ithatũ, Aisiraeli nĩ monire heni na itu rĩirũ Kĩrĩma-inĩ gĩa Sinai. Maacokire makĩigua marurumĩ na mũgambo wa coro. Thutha ũcio Jehova nĩ aaikũrũkire kĩrĩma-inĩ kĩu arĩ thĩinĩ wa mwaki. Aisiraeli nĩ maamakire mũno nginya magĩtigĩra. Kĩrĩma kĩu gĩothe kĩaiyũrire ndogo na gĩkĩinaina mũno, naguo mũgambo wa coro ũgĩthiĩ ũnenehete.Thutha ũcio Ngai akiuga: ‘Niĩ nĩ niĩ Jehova. Ndũkanahoe ngai ingĩ tiga niĩ.’
Musa nĩ aambatire kĩrĩma-inĩ rĩngĩ na Jehova akĩmũhe mawatho megiĩ ũrĩa andũ maagĩrĩirũo nĩ kũmũtungatĩra na ũrĩa maagĩrĩirũo nĩ gwĩka maũndũ. Musa nĩ aandĩkire mawatho macio agĩcoka akĩmathomera Aisiraeli. Moigire ũũ: ‘Tũrĩkaga ũrĩa wothe Jehova atwĩra twĩke.’ Nĩ maaigire kĩrĩko na Ngai. No hihi nĩ mangĩagĩtũũririe?
“No mũhaka wende Jehova Ngai waku na ngoro yaku yothe na muoyo waku wothe na meciria maku mothe.”—Mathayo 22:37
Icunjĩ Ingĩ Hihi Ũngĩenda Gũthoma
KANDI CIA BIBILIA
Kandi ya Bibilia ya Musa
Hihi nĩũĩ atĩ Musa nĩwe mũndũ wa mbere thĩinĩ wa Bibilia kũringa ciama? Cuurũria kandi ĩno ũmenye makĩria.
