Eemwedi mbali lwaapo okudja eshi Ovaisrael va fiya po Egipti, ova li va fika pomhunda yaSinai ndele tava ongo onhanda. Jehova okwa popya naMoses, oo a ya komhunda, ndele te mu lombwele ta ti: ‘Onda xupifa Ovaisrael, ngeenge ova dulika nokupwilikina kondaka yange, otava ka ninga oshiwana shange she likalekelwa.’ Moses okwa li a alukila kOvaisrael ndele te va lombwele osho Jehova a ti. Mbela ova li ve linyenga ngahelipi? Ova li va nyamukula tava ti: ‘Ashishe osho Jehova e tu lombwela, ohatu ke shi ninga.’

Moses okwa li a ya vali komhunda ndele Jehova te mu lombwele ta ti: ‘Mefiku etitatu, ohandi ka popya nanye. Lombwela oshiwana shihe uye pomhunda yaSinai.’ Moses okwa li a ya kOvaisrael ndele te va lombwele ve lilongekidile oku ka pwilikina osho Jehova te ke va lombwela.

Mefiku etitatu, Ovaisrael ova li va mona oushelu noshilemo shilaula shi li komhunda. Ova li yo va uda omingungumo dinene nosho yo enghuma. Opo nee Jehova okwa li a londoloka komhunda e li molupe lomundilo. Ovaisrael ova li va tila neenghono nova li tava kakama. Omhunda aishe oya li ya kakama neenghono noya li ya tuvikilwa komwifi, nenghuma ola li tali shikwa pombada neenghono. Opo nee Kalunga okwa tya: ‘Aame Jehova. Ino linyongamena oikalunga imwe.’

Moses okwa li a ya vali komhunda, na Jehova okwa li e mu pa eemhango di nasha nanghee ovanhu ve na oku mu longela nokudulika. Moses okwa li a shanga eemhango odo noku di leshela Ovaisrael. Ova li va udaneka tava ti: ‘Ohatu ka ninga keshe osho Jehova te tu lombwele tu ninge.’ Kungaho, ova li va ningila Kalunga eudaneko. Mbela ova li ngoo va wanifa po osho va li va udaneka?