Konyima zomakwedi gavali kutunda apa Vaisraeli va tundire moEgipite tava ya siki poNdundu zaSinayi tava dike kamba zawo. Jehova kwa zigidire Mosesa a ronde kondundu nokumutantera asi: ‘Ame kwa zowora Vaisraeli. Nsene va purakena nge nokulimburukwa konoveta dange, ngava kara vantu vange.’ Mosesa ta tengura koVaisraeli nokukavatantera eyi ga mu tanterere Jehova. Ngapi va limbwilire Vaisraeli? Awo kwa limbwilire asi: ‘Ose ngatu rugana nayinye eyi ana uyunga Jehova.’

Mosesa ta rondo hena kondundu. Jehova ta mu tantere asi: ‘Ngani uyunga none mezuva lyautatu. Ka pukurure vantu asi kapisi ngava ronde kondundu.’ Mosesa ta humburuka nokukatantera Vaisraeli va liwapaikire kupurakena kwaJehova.

Konyima zomazuva gatatu, Vaisraeli tava mono maruvadi neremo lyesovagani kondundu. Tava zuvhu sindundumo sosinene norumbendo. Makura Jehova ta wiza pondundu momundiro. Vaisraeli kwa kere nowoma makura tava kankama. Ndundu nazinye kwa kere musi ntani kwa kankamene unene. Ezwi lyombendo tali ziguruka unene. Karunga ta tanta asi: ‘Ame nyame Jehova. Nokukarera si vakarunga nawopeke kumwe name.’

Mosesa ta tengwire kondundu makura Jehova ta ka mu pa noveta kuhamena omu nava mu karera nomu va hepa kukara. Mosesa kwa tjenge noveta odo nokudiresera Vaisraeli. Awo tava tumbwidire asi: ‘Ose ngatu rugana nayinye eyi ana uyunga Jehova.’ Awo kwa tumbwidilire Karunga. Nye va yi sikisire mo ndi?