Vioka tezo kia ngonde zole vava Aneyisaele bavaika muna Engipito, balwaka vana Mongo a Sinai. Yave wabokela Mose vana ntandu a mongo yo kumvovesa vo: ‘Mono yavulwizi Aneyisaele. Avo bekundemvokela yo lunda e nsiku miame, bekituka se nkangu ame akuvuila.’ Mose wakulumuka kuna mongo yo zayisa kwa Aneyisaele mana Yave kamvovesa. Adieyi bavanga? Bavutula vo: ‘Mawonso kavovele o Yave i tuvanga.’

Mose watomboka diaka kuna mongo. Yave wamvovesa vo: ‘Lumbu tatu isidi, diambu ivova. Lukisa o nkangu balembi tomboka vana ntandu a Mongo a Sinai.’ Mose wayenda kwa nkangu yo kubavovesa vo bakubama mu wá e nding’a Yave.

Vioka lumbu tatu, Aneyisaele bamona nsemo ye tuti dia ndombe vana mongo. Bawá mpe zú diangolo dia miandazi ye mpungi. I bosi, Yave wakulumuka vana mongo muna tiya. Aneyisaele bamona wonga yo yantika zakama. O mongo wawonso wazakama yo zala ye mwisi. E zú dia mpungi diakwamanana wokela. Yave wavova vo: ‘Mono i Yave. Ke nufwete sambila nzambi zankaka ko.’

Vava Mose katomboka diaka kuna Mongo, Yave wamvana e nsiku miasonganga una nkangu bafwete kunsambila ye una bafwete kadilanga. Mose wasoneka nsiku miami muna babu yo tangila mio Aneyisaele. Basia nsilu vo: ‘Mawonso kavovele o Yave i tuvanga.’ Nga balungisa o nsilu basia kwa Nzambi?