Hamulaho wa likweli zebato eza zepeli kuzwa fobazwela mwa Egepita, Maisilaele bafita fa Lilundu la Sinai mi batoma mafulo. Mushe kihaa kambama fa lilundu mi Jehova ali ku yena: ‘Nenipilisize Maisilaele. Haiba baniutwa ni kulatelela milao yaka, bakaba sicaba saka tota.’ Mushe ashetumuka kuzwa fa lilundu mi ayo bulelela Maisilaele zanaa mubulelezi Jehova. Ki lika mañi zene baezize Maisilaele hane bautwile zanaa babulelezi Mushe? Kihaa baalaba kuli: ‘Lukaeza lika kaufela zabata Jehova kuli lueze.’

Mushe ki hakambama fa lilundu hape. Teñi koo, Jehova ali ku yena: ‘Hamulaho wa mazazi amalaalu nikaambola ku wena. Ulemuse batu kuli basike basutelela kwa Lilundu la Sinai.’ Mushe kihaa shetumuka mi ayo taluseza Maisilaele kuli baitukiseze kuteeleza ku zakabulela Jehova.

Hamulaho wa mazazi amalaalu, Maisilaele babona lumonyi ni lilu lelinsu fahalimwaa lilundu. Hape bautwa mushika ni mulumo wa lunaka. Cwale Jehova ashetumukela fa lilundu mwa mulilo. Maisilaele nebasabile hahulu kuli mane bangangama. Lilundu kaufela neli nyanganya hahulu mi nelitezi musi. Mulumo wa lunaka neuzwelapili kuekezeha. Cwale Mulimu kihaa li: ‘Ki na Jehova. Hamuswaneli kulapela milimu isili.’

Mushe akambamela hape fa lilundu, mi Jehova amufa milao yeneka tusa Maisilaele kuziba mwakulapelela Jehova ni mone baswanela kupilela. Mushe añola milao kaufela, hasamulaho ayo ibala fapilaa Maisilaele. Kiha basepisa kuli: ‘Lukaeza lika kaufela zabata Jehova kuli lueze.’ Kaniti, nebasepisize Mulimu. Kono kana nebaka taleleza sepiso yabona?