Pa kupwa kwa myeji isenselela ku ibidi na pobātambile mu Edipito, bene Isalela bāfikile ku Lūlu lwa Shinai bāshimika’ko nkambi. Yehova wāityile Mosesa akande pa lūlu, wāmusapwila’mba: ‘Napandija bene Isalela. Shi bankōkele ne kulama bijila byami, bakekala bantu bami ba pa bula.’ Mosesa pa kutūka pa lūlu, wāsapwila bene Isalela byanena Yehova. Le bālondolwele namani? Bālondolwele’mba: ‘Tukalonga byonso byetunena Yehova kulonga.’

Mosesa wākanda monka pa lūlu. Yehova wāmusapwila’po amba: ‘Kupwa kwa mafuku asatu, nsa kwisamba nenu. Dyumuna bantu baleke kukanda pa Lūlu lwa Shinai.’ Mosesa wātūka wāsapwila bene Isalela beteakanye mwanda wa kuteja Yehova.

Pa kupwa kwa mafuku asatu, bene Isalela bāmona mapeni ne dikumbi difīta pa lūlu. Kadi bāivwana mikungulo ne kuvuma kwa lusengo. Kupwa, Yehova wātūka pa lūlu mu mudilo. Bene Isalela pa kukwatwa moyo bininge, kebāzakala. Lūlu lonso lwātenkana bininge, ne mwishi wēlupūta. Kuvuma kwa lusengo kwādi’nka kubaila’ko. Kupwa, Leza wānena’mba: ‘Ami ne Yehova. Kemufwaninwepo kutōta baleza bakwabo.’

Mosesa wākajokela pa lūlu, Yehova wāmupa bijila bya mufwaninwe bantu kumutōtela, ne mobafwaninwe kwikadila. Mosesa wālembele bino bijila, kupwa wākatangila’byo bene Isalela. Balaa’mba: ‘Tukalonga byonso byetunena Yehova kulonga.’ Bine, bālaile Leza mulao. Le bālongele bino byobanena?