Të nety nyaxy majtsk poˈo mä ja israelitëty pyëtsëmdë Egipto, ko jyäjttë mä ja Sinaí gopk ets jam ojts nyaynyikojëdë. Ta Jyobaa tˈanmääyë Moisés ets pyatëkët mä ja kopk ets jam duˈun tˈanmääy: “Ëjts të nyaˈˈawäˈätspëtsëmyë israelitëty. Pën yëˈëjëty xymyëmëdoowdëbëts ets kyuytyuundëp ja nˈanaˈamënëts, tats yëˈë ngäjpnˈatäˈäny”. Ko Moisés jyënajky mä ja kopk, ta ttukˈawäˈänë ja israelitëty wiˈixë netyë Jyobaa të jyënaˈany. Ta ja israelitëty yˈatsoowdë: “Ndunandëbëts tukëˈëyë extëmë Jyobaa të jyënaˈany”.

Ta jatëgokë Moisés pyatëjkë mä ja kopk. Jamë Jyobaa yˈanmääyë: “Kyumdëgëk xëëwëts nmëgäjpxäˈänyë israelitëty. Anëëmëdë ko kyaj pyatëkëdët mä Sinaí gopk”. Moisés ta jyënajky ets tˈanmääy ja israelitëty parë nyayjëjpˈixëdët ets tmëdoowˈittët wiˈixë Jyobaa jyënäˈänäˈäny.

Kyumdëgëk xëëw, ta ja israelitëty tˈijxtë anaaw jëtsuk ets ja yoots nëmäˈä kopkëjxy kootspëmiimnë. Nan myëdoowdë ko mëk nyojktaky ja anaaw ets yajtukxuˈuxyë tsäjpkääwäj. Ta Jyobaa jyënajky jënˈyaˈangoty. Ta ja israelitëty jyantsy tsyëˈkëdë. Ets ja tun kopk nyitujktääy mëdë jënjok ets jyantsy pyëmiimy. Ets mas mëk yajmëdoownë ko yajtukxuˈuxy ja tsäjpkääwäj. Ta Jyobaa jyënany: “Ëjtsën Jyobaa. Kyaj pënë wiinkpë Dios xyˈawdattët”.

Ta jatëgokë Moisés pyatëjkë kopkëjxy ets jamë Jyobaa myooyë kanäägë anaˈamën parë ja käjpn. Mä tyäˈädë anaˈamën, japë Jyobaa yˈanmääyëdë wiˈix mbäät tˈawdattë ets wiˈix mbäät jyaˈayˈattë. Ta Moisés tkujäˈäyë, ets ok, ta ojts ttukwingugäjpxë ja israelitëty. Yëˈëjëty ta twandaktë: “Ndunandëbëts tukëˈëyë tijatyë Jyobaa yˈamdoopy”. Ta ttukwandaktë Dios ko tmëmëdowäˈändë, per ¿waˈandaa tkuytyuundë?