Lino papisile imyezi mupiipi na iili kufuma pano Aina Izlaeli yafumile umu Ijipti, yafisile uku Mwamba uwa Sinai, iyapanga ni nkambi kuku kwene. Yeova wamile Mose ukuti aye uku Mwamba wa Sinai, nupya wamuneenyile ati: ‘Neene napuswisye Aina Izlaeli. Ndi cakuti yakunguvwila nu kusunga masunde yane, yalaya antu yane aiyele.’ Lino Mose waswilile, waile anena Ina Izlaeli vino Yeova wamunenyile. Uzye yaswike uli? Yatile: ‘Twakulacita vyonsi vino Yeova watuneena ukucita.’

Mose waswilile uku mwamba nupya. Lino wafisile Yeova wamuneenyile ati: ‘Ndalanda nawe pa wanda walenga citatu. Uneene antu ukuti yatakezye ukupalama uku Mwamba wa Sinai.’ Mose waile aneena Aina Izlaeli ukuti yaipekanye ukuvwa kuli vino Yeova walondanga ukuyaneena.

Lino papisile manda yatatu, Aina Izlaeli yaweni kumyantula kwa kuwa ni kumbi lifiite pa Mwamba uwa Sinai. Nupya yuvwile kupangalakansya nu kulila kwa ntandala. Lyene Yeova wikiile pa mwamba umwi kumbi lya moto. Aina Izlaeli yuvwile intete icakuti yatandike ukuzakaza. Umwamba watenkanyile sana nupya kwali vyunsi. Ukulila kwa ntandala kwayanga ku kukulilako sile. Nupya Leza watile: ‘Neene Yeova. Mutalinzile kupepa ya leza yauze.’

Lino Mose waswilile uku mwamba, Yeova waile amupeela masunde pali vino antu yaalinzile ukulamupepa na vino yaalinzile ukulacita. Mose walemvile masunde yayo nupya wabelengiile Aina Izlaeli. Yalavile ati: ‘Tulaacita vyonsi vino Yeova watuneena ukucita.’ Yalavile kuli Leza. Nomba uzye yafikilizye ulayo uwo?