Ãlikin an kar RiIsrael ro diwõjl̦o̦k jãn Ijipt, emaroñ ruo allõñ tokãlik im rej kab tõpar Tol̦ Sainai im kajutak em̦ nuknuk ko aer iturin tol̦ in. Ke Jeova ear kũr Moses, Moses ear wanlõñl̦o̦k ñan ioon tol̦ eo im Jeova ear ba ñane: ‘Iar lo̦mo̦o̦ren RiIsrael ro. El̦aññe rej roñjake eõ im pokake kien ko aõ, inaaj bõk er bwe ren armej ro aõ.’ Innem Moses ear wanlal̦l̦o̦k jãn tol̦ eo im kwal̦o̦k ñan RiIsrael ro men ko Jeova ear ba. Kar ta l̦õmn̦ak eo an RiIsrael ro kõn naan ko An? Rar uwaak im ba: ‘Jenaaj kõm̦m̦ani aolep men ko Jeova ej jiroñ kõj bwe jen kõm̦m̦ani.’

Tokãlik Moses ear bar wanlõñl̦o̦k ñan ioon tol̦ eo. Ke ear pãd ijo, Jeova ear ba: ‘Jilu raan jãn kiiõ, inaaj kõnnaan ñan kom̦. Im kwõn kõjjel̦ãik armej ro bwe ren jab kajjioñ wanlõñtak ñan ioon tol̦ in.’ Innem Moses ear wanlal̦l̦o̦k im jiroñ RiIsrael ro bwe ren pojak bwe renaaj roñ ainikien Jeova.

Ilo raan eo kein kajilu, RiIsrael ro rar lo an ejjaromrom im kilmeej kõdo̦ ko ilõñin tol̦ eo. Rar roñ ainikien jourur im ainikien jilel. Innem Jeova ear wanlal̦tak ñan ioon tol̦ eo ilo juon kijeek. RiIsrael ro rar lukkuun mijak im wũdiddid. Tol̦ eo ear lukkuun l̦ap an m̦akũtkũt im ear jakol̦o̦k kõn baat. Innem ear l̦apl̦o̦k wõt ainikien jilel eo im Anij ear ba: ‘Ña Jeova. Kom̦win jab kabuñ ñan bar jabdewõt anij.’

Moses ear bar wanlõñl̦o̦k ñan ioon tol̦ eo, im Jeova ear lel̦o̦k ñane kien ko An ñan armej ro. Kien kein an rar kwal̦o̦k kõn wãween aer aikuj kabuñ ñan E, ta ko rej aikuj kõm̦m̦ani, im ta ko rejjab aikuj kõm̦m̦ani. Moses ear jei kien kein im ear riitil̦o̦k ñan RiIsrael ro. Innem rar kallim̦ur im ba: ‘Kõm naaj kõm̦m̦ani aolep men ko Jeova ej jiroñ kõm bwe kõmin kõm̦m̦ani.’ Ealikkar bwe rar kõm̦m̦ane juon kallim̦ur ñan Anij, ak renaaj ke kajejjete kallim̦ur in aer?