အစ္စရေး​တွေဟာ အီဂျစ်ပြည်​က​ထွက်လာ​ပြီး နှစ်​လ​လောက်​အကြာ​မှာ ဆိုင်းနိုင်း​တောင်​ကို ရောက်ပြီး စခန်းချ​ကြ​တယ်။ ယေဟောဝါဟာ မောရှေ​ကို တောင်ပေါ်​တက်လာ​ခိုင်း​ပြီး ‘အစ္စရေးတွေကို ငါ ကယ်​ခဲ့​ပြီ။ သူတို့​သာ ငါ့​စကား​နားထောင်ပြီး ငါ့​ပညတ်​တွေလို​က်​နာ​ရင် ငါ့ရဲ့​အထူးလူမျိုး​ဖြစ်ခွင့်​ရမယ်’ လို့ပြောတယ်။ တောင်​အောက် မောရှေ ပြန်​ဆင်း​လာပြီး အစ္စရေး​တွေကို ယေဟောဝါ​ပြောတာ​တွေ ပြန်​ပြောပြတယ်။ သူတို့​ဘယ်လို​တုံ့ပြန်​သလဲ။ ‘ယေဟောဝါ ပြော​သမျှကို နာခံ​လိုက်နာ​ပါ့​မယ်’ လို့ ကတိပြု​ကြ​တ​ယ်။

မောရှေ​ဟာ နောက်​တစ်ခေါက် တောင်ပေါ်​ပြန်​တက်​သွားတယ်။ အဲဒီမှာ ယေဟောဝါ​ဘုရားက ‘နောက်​သုံးရက်​ကျ​ရင် မင်း​ကို ငါ စကားပြော​မယ်။ ဆိုင်းနိုင်း​တောင်ပေါ် တခြားသူတွေ တက်​မလာ​ပါစေ​နဲ့’ တဲ့။ မောရှေ တောင်​အောက်​ပြန်​ဆင်း​လာပြီး အစ္စရေး​တွေကို ယေဟောဝါ ပြောတာ​နားထောင်​ဖို့ အသင့်​စောင့်နေ​ပါ​လို့ မှာ​ခဲ့တယ်။

သုံးရက်​မြောက်​နေ့​မှာ လျှပ်စီး​တွေ​လက်​ပြီး တောင်ပေါ်​ကို တိမ်ထုကြီး ဆင်း​လာ​တာ အစ္စရေးတွေ မြင်​တ​ယ်။ မိုးခြိမ်းသံ​နဲ့ တံပိုးမှုတ်သံ​လည်း ကြားတယ်။ အဲဒီနောက် ယေဟောဝါက မီးလျှံ​နဲ့ ဆင်း​လာတယ်။ အစ္စရေးတွေ ကြောက်ဒူးတုန်​ကုန်​ကြ​တ​ယ်။ တောင်​တစ်​တောင်​လုံး သွက်သွက်ခါ​အောင် လှုပ်​နေ​ပြီး မီးခိုး​တွေ တက်လာ​တ​ယ်။ တံပိုးမှုတ်သံ​ဟာ ကျယ်​သည်ထက် ကျယ်​လာတယ်။ ဘုရားက ‘ငါ​ဟာ ယေဟောဝါ​ပဲ။ တခြား​ဘယ်​ဘုရားကို​မှ မင်း​တို့ ဝတ်​မပြု​ရဘူး’ လို့ပြောတယ်။

မောရှေ တောင်ပေါ်​ပြန်​တက်​သွားတဲ့​အခါ ယေဟောဝါက ကိုယ်တော့်ကို လူတွေ ဘယ်လို ဝတ်ပြုကိုးကွယ်​ရမယ်၊ ဘယ်လို ပြုမူနေထိုင်​ရမယ် ဆိုတဲ့​ပညတ်​တွေ ပေးတယ်။ အဲဒီ​ပညတ်​တွေကို မောရှေ ချရေး​ပြီး အစ္စရေး​တွေကို ပြန်​ဖတ်ပြ​တ​ယ်။ သူတို့က ‘ယေဟောဝါ ပြော​သမျှ နာခံ​လိုက်နာ​ပါ့​မယ်’ လို့​ကတိ​ပေးကြတယ်။ ဘုရားသခင်ကို သူတို့ အဲဒီလို ကတိ​ပေးတယ်။ ဒါပေမဲ့ သူတို့ ကတိတည်​ပါ့​မလား။