Kema ya panotoya se ome metstli israeleuanij kistejtoyaj Egipto, asitoj ipan tepetl Sinaí, uan nopaya kichijkej ininyoyonkaljuaj. Jehová kiiljuik Moisés ma tlejko ipan nopa tepetl, uan kiiljuik: “Na nikinmanauik israeleuanij. Tlaj inijuantij nechneltokasej uan kichiuasej tlen nikinnauatis, nikintlapejpenis ma elikaj notekipanojkauaj”. Kema Moisés temok, kiniljuik tlen Jehová kiiljuijtoya. ¿Tlake kiijtojkej inijuantij? Kiijtojkej: “Nochi tlen Jehová tlanauatijtok, tijchiuasej”.

Teipa, Moisés sampa tlejkok ipan nopa tepetl. Uan Jehová kiiljuik: “Uiptla nitemos kampa itstokej israeleuanij uan nikinnojnotsas. Xikiniljui amo aka ma tlejko ipan ni tepetl”. Uajka Moisés temok uan kiniljuik israeleuanij ma mokualchijchiuakaj pampa Jehová kinnojnotsaskia.

Ualuiptla, israeleuanij kiitakej se mixtli tepeixko uan tlapetlaniyaya. Nojkia kikajkej chikauak tlatomonki uan kakistiyaya kipitsayayaj se kuakuajtli. Teipa Jehová temok ipan se tlitl. Israeleuanij tlauel momajmatijkej. Nopa tepetl chikauak mojmoliniyaya uan tlauel popokayaya. Uan tlauel chikauak kakistiyaya kejuak kipitsayayaj se kuakuajtli. Uajka Jehová kiniljuik: “Na niinmoTeko Jehová. Amo xikinueyichiuakaj sekinok teotsitsij”.

Moisés sampa tlejkok ipan nopa tepetl, uan Jehová kimakak tlanauatili tlen kichiuaskiaj israeleuanij. Nopa tlanauatili kiijtouayaya kenijkatsa kiueyichiuasej uan kenijkatsa monejnemiltisej. Moisés kiijkuilok nopa tlanauatili uan teipa kinpouilik israeleuanij. Uan inijuantij kiijtojkej: “Tijchiuasej nochi tlen Jehová technauatijtok”. Kiampa kiiljuijkej Jehová kena kichiuaskiaj tlen kinnauatijtoya. ¿Nelia kichiuaskiaj tlen kiijtojkej?