No papera mweji muviri novabva ku Ejipita, vaIziraeri vakaguma pa Dundhu ro Sinai zve vakavaka akampamento kana mucaca. Jehovha wakadanija Mosi, kuti aende ku dundhu zve paakagumeyo, wakamubvunja kuti: ‘Ndaponesa vaIziraeri. Kudari ivona vakazwira mutemo jangu, vanozoguma pa kuva vandhu vangu vanosisira.’ Mosi wakahwirira zve wobvunja vaIziraeri zvakananga Jehovha. Vakadavirisa kudini? Ivona vakati: ‘Tinozoita zvese zvinotibvunja Jehovha kuti tiite.’

Mosi wakaendazve ku dundhu. Kondhoyo, Jehovha wakati: ‘Mu njiku ndhatu, ndinozobhuya newe. Ngwajai vandhu kuti vacadoeja kuvia ku dundhu ro Sinai.’ Mosi wakahwirira, wobvunja vaIziraeri kuti vanasirire kuti vazwe Jehovha ecivereketa.

No papera njiku ndhatu, vaIziraeri vakavona kubwaka no makwiti akasvipa pa dundhu. Ivona vakazwa kutaka ko mbheni no kurira ko mbayapaya. Jehovha wakaviya pa dundhu mu muriro. VaIziraeri vakathya zvokuti vakatetemera. Dundhu rese raizungunyika zve raikwakwatijwa ngo usi. Mbayapaya yaizika ngo izwi guru. Perepo Mwari wakati: ‘Ndini Jehovha. Amudikani kunamata zvimwari zvimweni.’

Mosi wakaenda nyezuru ko dundhu zve Jehovha wakamupa mutemo kuitira vandhu ngo pamusoro po manamatiro o vaidikana Kumuita no mufambiro wovaidikana kuva nawo. Mosi wakatara mutemo jondhojo zve wakajiverenga kuno vaIziraeri. Ivona vakagondesa kudari: ‘Tinozoita zvese zvinotibvunja Jehovha kuti tiite.’ Hina, vakaita cigondiso kuna Mwari. Asi vakakwanisa kuramba naco here?