Konima yoomwedhi mbali lwaampono, sho Aaisraeli ya zi muEgipiti, oya yi kOndundu Sinai e taya yungu ontanda. Jehova okwa li i ithana Moses, ngoka a li kondundu, e te mu lombwele ta ti: ‘Onda hupitha Aaisraeli. Ngele otaya vulika kungame e taya dhiginine ehangano lyandje, otaya ningi aantu yandje mwene.’ Moses okwe ya kAaisraeli, e te ya lombwele shoka Jehova a popi. Mbela oya li ya yamukula ngiini? Oya ti: ‘Otatu gwanitha ashihe shoka Jehova a hala tu ninge.’

Moses okwa shuna ko ishewe kondundu. Jehova okwe mu lombwele a ti: ‘Mesiku etitatu, otandi ka popya nangoye. Londodha aantu kaaya kambadhale nando okuya kOndundu Sinai.’ Moses okwa kulukile pevi e ta lombwele Aaisraeli yi ilongekidhe okupulakena kuJehova.

Konima yomasiku gatatu, Aaisraeli oya li ya mono olwaadhi noshikogo oshiluudhe kondundu. Oyu uvu wo endundumo nenkuma tali hikwa. Opo ihe Jehova okwa kuluka ko kondundu e li molupe lwomulilo. Aaisraeli oya li ya tila noonkondo taya kakama. Ondundu ayihe oya kakama noonkondo noya li tayi gundumuka olwithi. Ewi lyenkuma olya kugagana muule. Kalunga okwa ti: ‘Ongame Jehova. Ino kala wu na ookalunga yalwe.’

Moses okwa shuna kondundu. Jehova  okwe mu pe oompango dhankene aantu ye na oku Mu longela nankene ye na okwiihumbata. Moses okwa nyola oompango ndhoka nokwe dhi leshele Aaisraeli. Oyu uvanekele Jehova ya ti: ‘Otatu ka ninga kehe shimwe to tu lombwele.’ Eeno, Aaisraeli oya li ya ningile Jehova euvaneko. Mbela oya li ngaa taye ke li gwanitha po?