Saavinraaya nyeeri miili ekhumme o Yikuputu, Aisarayeli yaaphiya o Mwaako Sinai nave yaahaya. Yehova aamwiichana Mose wi awele o Mwaako Sinai nave aamuleela: ‘Kihoruhaani wenno. Vano mweema okiiwelela ni ochariwa waataana waka, nyuwaano munamukhala nloko naka.’ Mose aakhuruwa nave aahaaleela achu yeeyo Yehova aalonceiye. Yaakhunle hai? Awo yaahi: ‘Hiyaano nnamwiiwelela soothene Apwiya aloncaaya.’

Mose aakookela tho o mwaako. Ari weiwo, Yehova aaloca: ‘Omuroco kinamukhuruwa va Mwaako Sinai ni kinamwiisooneiha wa achu oothene. Waaleele oriki: ahikhale ani awele va mwaako naari waacamelavo.’ Mose aakhuruwa wi aaleele Aisarayeli ekhale ooreheryeya wi enwiriyane Yehova.

Mahiku mararu ohoolo waya, Aisarayeli yaahoona oseruma ni meeku ooripa va mwaako. Yaaniiwa tho oruma wa etari ni mapeka. Nave Yehova aakhuruwela va mwaako variyari va mooro. Aisarayeli yaapacerya woova ophiyerya enathukumela. Mwaako woothene waanacikinyeya nave waasareya mwiixi. Oruma wa mapeka waanaaceereryeya. Nave Muluku aaloca ariki: ‘Miyo ka Yehova. Muhiweepeseke amuluku akina.’

Yehova amvaha Mose malamulo wi aahusihe achu mukhalelo wa omulapela Muluku. Voocharela Mose aakhuruwa va mwaako. Owo aarepa malamulo yaawo nave aahaalakhanya wa Aisarayeli. Awo yaapaka nlakano ni Muluku eriki: ‘Hiyaano nnamweera ichu soothene Apwiya anirummaaya.’ Apwanne yaakhapelela nlakano nlo?