Ízrel dineʼé naaki nídeezidgo Ííjipdę́ę́ʼ chʼíjíkai bikéédóó, Dził Sáínaijįʼ nizhníná. Mózes éí dziłdi haayáago, Jiihóvah hachʼįʼ haadzíiʼgo áháłní: ‘Ízrel dineʼé yisdáánil. Shizaad dóó bee hazʼáanii bikʼeh dahojíłʼı̨́įgo éí shidineʼé dajílı̨́į doo.’ Áko Mózes nádzáago Jiihóvah yee hachʼįʼ haadzííʼ yę́ę Ízrel dineʼé tʼáá átʼé bił chʼízhníʼą́. Yinahjįʼ haʼátʼíí daaní? Kódaaní: ‘Jiihóvah nihichʼįʼ yee haadzíʼígíí tʼáá ałtso bikʼeh ádadiiʼnííł.’

Mózes dziłgóó hanáádzoodzá. Áadi Jiihóvah kóhodííniid: ‘Tááʼ náánéiską́ągo nichʼįʼ hanáádeesdzih. Diné Dził Sáínai bikáaʼjįʼ haohkááh lágo bididííniił.’ Áko Mózes adanáádzáago, Ízrel dineʼé Jiihóvah dadidootsʼı̨́ı̨́ł biniyé hashtʼeʼádadołnééh yidííniid.

Tágí jı̨́ azlı̨́ı̨́ʼ bikéédóó, nidaʼdilchʼil dóó dził bąąh kʼos diłhiłgo Ízrel dineʼé dayiiłtsą́. Daʼdiʼní dóó bee íʼdílzoołí ayóó íitsʼaʼgo ałdóʼ deidiiztsʼą́ą́ʼ. Áádóó dził bikááʼdę́ę́ʼ Jiihóvah éí kǫʼ yił hadah hóóleʼ. Ízrel dineʼé yéigo nídaasdzíidgo bitah dahoditłid. Dził ayóó átʼéego hideesʼnááʼ dóó łid ałtso bąąh silı̨́ı̨́ʼ. Áádóó bee íʼdílzoołí tʼáá yédígo bee hahodíídláád. Áko God ánááhodooʼniid: ‘Shí éí Jiihóvah áshtʼı̨́. Diyin náánáłaʼ tʼáadoo bá nidaałʼaʼí.’

Mózes dziłghą́ą́ʼgóó hanáádzoodzá, áádóó Jiihóvah bidineʼé haitʼéego bibee hazʼáanii bikʼehgo bá nidajilʼaʼ dooígi haidiníʼą́. Mózes éí Jiihóvah bibee hazʼáanii yikʼeʼashchı̨́ áádóó Ízrel dineʼé ałtso bichʼįʼ jííłtaʼ. ‘Jiihóvah yee hahaasdzíʼígíí tʼáá ałtso bikʼeh dahoniilʼı̨́į doo,’ dadííniid. Éí God yichʼįʼ yee ádee hadahaasdzíiʼii átʼé. Ákoósh éí tʼáá aaníí yikʼeh ádadoonííł?