Mpen sounpwong riau mwurin ar kohkohlahsang Isip, mehn Israel ko lella Nahna Sainai oh kauwada imwarail impwal kan. Siohwa ketin ekerdahla Moses pohn nahnao, oh mahsanihong: ‘I kapitalahr mehn Israel kan. Ma irail peikiong ie oh kolokolete ei kosonned kan, irail pahn wiahla nei aramas tohrohr kei.’ Moses pwuredihla oh padahkihong mehn Israel ko dahme Siohwa mahsanihong pohn nahna Sainai. Dahme irail sapengki? Irail sapeng nda: ‘Se pahn wia soahng koaros me Siohwa mahsanihong kiht sen wia.’

Moses pil pwurehng kohdahla pohn nahnao. Wasao, Siohwa mahsanih: ‘Mwurin rahn siluh, I pahn mahseniong uhk. Kairehki aramas akan ren dehpa song en kohdahdo pohn Nahna Sainai.’ Moses eri pwuredihla oh padahkihong mehn Israel kan ren onopada oh rong mahsen me pahn kohsang rehn Siohwa.

Mwurin rahn siluh, mehn Israel ko kilangada lioal wie piripir oh depwek mosul ehu pohn nahnao. Irail pil rongada ngilen lapalahn nansapwe me posopos oh ngilen sowi ehu. Eri Siohwa ketidihdo pohn nahnao ni mwomwen mpwulen kisiniei. Mehn Israel ko uhdahn masepwehkada kahrehda arail wie rerrer. Nahnao pwon mwekidida oh ediniei kipehdi wasa koaros powe. Ngilen sowio kin wie lalaudla. Oh mwurin mwo Koht mahsanih: ‘Ngehi me Siohwa. Kumwail sohte pahn kaudokiong emen koht tohrohr.’

Moses eri pwuradahla pohn nahnao, oh Siohwa ketikihong ih kosonned kei ong mehn Israel ko duwen mwomwen arail pahn kaudokiong Ih oh mwomwen arail tiahk. Moses ntingihedi kosonned ko oh wadekohng mehn Israel ko. Irail eri inoukihda: ‘Se pahn wia soahng koaros me Siohwa mahsanihong kiht sen wia.’ Ei, irail wiahda inou ong Koht. Ahpw ia duwe, irail pahn kolokolete inou wet?