Egiptupita yarquyanqampita ishkë killatam israelïtakunaqa Sinaï jirkaman chäriyarqan, y tsëchömi juk tiempu quedakuyarqan. Tsënam Jehoväqa tsë jirkaman Moisesta witsäratsir kënö nirqan: “Noqam israelïtakunata salvarqä. Wiyakoq karnin y leynïkunata cumplirninqa, akrashqa markämi kayanqa”. Tsënam Moisesqa jirkapita urärir israelïtakunata willarqan Jehovä tsënö ninqanta. ¿Y ima niyarqantaq israelïtakunaqa? “Jehovä niyämanqantaqa llapantam wiyakuyäshaq” niyarqanmi.

Y Moisesqa yapëmi tsë jirkaman witsarqan. Tsëchömi Jehoväqa kënö nirqan: “Këpita kima junaqtam israelïtakunata parlapäshaq. Sinaï jirkaman mana witsäyämunampaq llapankunata willë”. Tsënam Moisesqa israelïtakunaman urarqan y willarqan tsë junaqpaq alistakuyänampaq.

Kima (kimsa) kaq junaqchömi israelïtakunaqa rikäriyarqan tsë jirkachö tillapyaqta y yana pukutë juntaqta. Jina räyu sinchipa pashtaqta y trompëtanö waqra waqaqtam wiyayarqan. Tsëllanam nina rurinchö jirkapita Jehovä urarqan. Y israelïtakunaqa alläpam mantsakäyarqan. Y jirkaqa chipyëpam qontatarqan y feyupam kuyurqan. Y waqra waqanqanmi cada kutichö mas fuertipa wiyakarqan. Tsënam Jehoväqa kënö nirqan: “Noqam Jehovä kä. Manam ni mëqantapis juk dioskunataqa adorayänëkitsu”.

Tsëpitaqa yapëmi Moisesqa jirkaman witsarqan, y tsëchömi Jehoväqa israelïtakunapaq leykunata qorqan. Tsë leykunam mandakurqan imanö adorayänampaq kaqta y imanö portakuyänampaq kaqta. Tsëkunata qellqëkurmi Moisesqa israelïtakunata leyipurqan. Tsënam, “Jehovä niyämanqantaqa llapantam wiyakuyäshaq” niyarqan. Tsënömi israelïtakunaqa wiyakoq kayänampaq Diosta äniyarqan, peru ¿cumpliyarqanku?