Israelitacuna Egiptomanta llujshishca ishqui quilla qꞌuipaca Sinaí urcuman chayashpami carpa huasicunata shayachircacuna. Diosca Moisestaca urcuman huichiyamui nircami. Chaipimi Diosca, ‘israelitacunataca ñucami quishpichircani. Paicuna ñuca imalla nishcata cazushpaca ñucapajlla llajtami cangacuna’ nircami. Moisesca urcumanta uriyashpaca Jehová imalla nishcatami israelitacunaman huillarca. ¿Paicunaca imatashi nirca? ‘Dios tucui imalla nishcataca rurashunllami’ nircacunami.

Moisesca cutinmi urcuman huichiyarca. Chaipimi Diosca, ‘quimsa punlla qꞌuipa ñuca llajtahuanmi parlagrini. Paicunamanca Sinaí urcuman ama huichiyanguichij nigri’ nirca. Moisesca urcumanta uriyashpaca israelitacunataca Jehová ima nishcata uyangapaj allichirichij nircami.

Quimsa punllacuna qꞌuipaca sinchita cꞌulun nishpa achij nicujta, yana pꞌuyu urcu jahuapi cajtami israelitacunaca ricurcacuna. Shinallataj bocinapi tocashcatami uyarcacuna. Qꞌuipaca Jehová Diosca chai urcu jahuaman nina chaupipi uriyamujpimi israelitacunaca yallitaj mancharircacuna. Chai urcuca cushnihuan tapashcami yallitaj chujchucurca. Bocina tocashcapish ashtahuan ashtahuan sinchimi uyarirca. Chaipimi Diosca, ‘ñucaca Jehová Diosmi cani. Shujtaj dioscunataca ama adoranguichij’ nirca.

Moisés cutin urcuman huichiyajpimi Diosca leycunata curca. Chai leycunapica Diosta ima shina adoranata, ima shina alli causanatami mandarca. Moisesca chaita quillcashca qꞌuipami israelitacunaman leyirca. Paicunaca, ‘Jehová tucui imalla nishcacunataca cazugrinchijmi’ nishpami ari nircacuna. Pero, ¿pajtachircacunachu?