Egiptomanta iskay killa lloqsimpusqanku qhepamanmi Israel runakunaqa Sinaí orqoq chimpanpi samaranku. Chaypin Diosqa Moisesta niran orqoman wichananpaq, chaypitaq payta niran: “Noqan Israel llaqtata salvarani. Sichus kamachikuyniykunata kasukunqaku chayqa, llaqtaymi kanqaku”, nispa. Chaytan Moisesqa Israel runakunaman willaran. ¿Ima nispan kutichiranku? Nirankun: “Jehová Diospa llapa kamachisqantan kasukusaqku”, nispa.

Chay qhepamanmi Moisesqa jujmanta orqota wicharan. Chaypin Diosqa payta niran: “Kinsa p’unchaymantan llaqtaman rimaykusaq. Llapankuman willay Sinaí orqoman ama wichamunankupaq”, nispa. Jinan Moisesqa Israel runakunaman willaran Diosta uyarinankupaq alistakunankuta.

Kinsa kaq p’unchaypin Israel runakunaqa rikuranku llifllikachayta, yana phuyu orqota tapaykusqantapas. Uyarirankun jatun t’ojayta, pututuq waqasqantapas. Jinan Jehová Diosqa orqoman uraykamuran nina ukhupi. Israel runakunaqa sinchi manchasqan kasharanku. Orqontinmi q’osñiwan tapasqa kasharan, allpapas sinchitan chhafchikuran. Pututuq waqasqanpas aswan fuertetan uyarikuran. Jinan Jehová Diosqa niran: “Noqan Jehová Diosqa kani. Aman waj diostaqa adorankichu”, nispa.

Moisesmi jujmanta orqota wicharan, chaypin Diosqa llaqtanpaq leykunata qomuran. Chaypin willaran Diosta imayna adorananku kasqanta, imaynata portakunanku kasqantapas. Moisesqa chaykunata qelqaspan Israel llaqtaman leeran. Llapankun prometekuranku: “Diospa llapa kamachisqantan kasukusaqku”, nispa. Ichaqa, ¿junt’arankuchu prometekusqankuwan?