Okolu duj masek otkeda gele peske taro Egipet, o Izraelcija resle dži ki planina Sinaj hem phravgje peske šatorija. O Mojsej sine ki planina hem o Jehova vakergja leske: „Me spasingjum e Izraelcon. Ako šunena man hem ako ikerena me zakonija, ka oven mlo posebno narodo“. Keda o Mojsej irangja pe tele ko manuša vakergja lenge adava so vakergja leske o Jehova. Sar reagiringje? Sarine vakergje: „Ka kera sa so ka vakerel amenge o Jehova“.

O Mojsej palem uklilo ki planina. Adari o Jehova vakergja leske: „Palo trin dive, palem ka kerav tuja lafi. Vaker e narodoske te na uklel upre ki planina Sinaj“. Palo adava, o Mojsej hulilo tele ko Izraelcija hem vakergja lenge te oven spremna soske ka šunen e Jehovaskoro glaso.

Palo trin dive, o Izraelcija dikhle temno oblako upri planina, a isto agjaar dikhle hem šungje zvukija taro gromija hem glaso tari šing. Tegani o Jehova alo ki planina sar jag. O Izraelcija tresinena sine tari dar. Celo planina počmingja te tresinel hem sine učhardi čuro. O zvuko tari šing ovela sine sa posilno hem posilno. Tegani o Devel vakergja: „Me sium o Jehova. Na smejnena te služinen javere devlenge“.

O Mojsej palem gelo ki planina hem o Jehova dengja le zakonija e manušenge sar valjani te služinen leske hem sar te ponašinen pe. O Mojsej pišingja akala zakonija hem čitingja len e Izraelconge. Sarine ola vetingje: „Amen ka kera sa so vakerela amenge o Jehova“. Oja, ola dengje lafi e Devleske. Ama, dali kergje adava so vetingje?