Прожылэ дуй шон, сар израильтяноря вижылэ анда Египто и авелэ каринг фартэ баро плай Синай. Котэ вонэ стодэ катуны. О Иегова мангля лэ Моисеёс, тэ ваздэлпэ по плай и котэ ԥэндя лэсти: «Мэ спасысардэм лэ израильтянонэн. Сар вонэ лэна ман тэ кандэн и тэ ритярэн мэрнэ законоря, вонэ ашэна мэрно особо народо». О Моисеё змэкляпэ па плай и пэрэдя лэнди лэ Иеговастирэ алава. Пэ Моисеёстирэ алава израильтяноря ԥэндэ: «Амэ стераса вся, сар ԥэндя о Иегова».

О Моисеё упалэ вазгляпэ по плай. Котэ о Иегова ԥэндя: «Прожала дуй дес и мэ лава тэ дав дума туса. Пэрэдэ лэ манушэнди, кай нико андар лэндэ даже тэ на пашол каринг о плай». О Моисеё змэкляпэ и ԥэндя, кай вонэ тэ аштярэн, кала о Иегова лэла тэ дэл дума лэнца.

По трито дес вонэ додиқлэ, кай по плай дядап молния и вижыля кали туча. Вонэ кадяжэ ашундэ баро ӷромо и о звуко анда роӷо. Тоди ла ягаса о Иегова змэкляпэ по плай. И мануша кадя пэрэдарайлэ, кай линэ тэ тинонпэ даратар. Лэ плаестар ля тэ жал ҭув и о плай ля тэ тинойпэ. О звуко анда роӷо ашундёласпэ со май фартэ и май фартэ. Тоди о Иегова ԥэндя: «Мэ о Иегова, тумаро Дэл. На тэлён аврэ дэвлэнди».

О Моисеё рисайля по плай, и котэ о Иегова дя лэсти законоря. Андэ законоря ԥэнэнаспэ, сар тэ тэлён лэ Дэвлэсти и сар пэс тэ андярэн. О Моисеё запистросардя кадэла законоря и проадиносардя лэ израильтянонэнди. Вонэ динэ алав: «Амэ ласа тэ андярас пэс кадя, сар ԥэнэн о Иегова». Кадя вонэ динэ алав лэ Дэвлэсти. Но зритярэна вонэ лэс?