Rreth dy muaj pasi ikën nga Egjipti, izraelitët mbërritën në malin Sinai dhe ngritën kampin. Jehovai thërriti Moisiun, i cili u ngjit në mal, dhe i tha: «Izraelitët i shpëtova unë. Nëse ata më binden dhe zbatojnë ligjet e mia, do të bëhen populli im i veçantë.» Moisiu zbriti nga mali dhe u tregoi izraelitëve çfarë i kishte thënë Jehovai. Si u përgjigjën ata? Izraelitët thanë: «Do të bëjmë gjithçka që na kërkon Jehovai.»

Moisiu u ngjit prapë në mal. Atje Jehovai i tha: «Ditën e tretë do të flas me ju. Paralajmëroje popullin të mos ngjitet në malin Sinai.» Moisiu zbriti dhe u tha izraelitëve të përgatiteshin që të dëgjonin Jehovain.

Ditën e tretë izraelitët panë vetëtima dhe një re të zezë që mbuloi malin. Ata dëgjuan edhe bubullima të forta dhe tingullin e një briri. Pas kësaj Jehovai zbriti mbi mal në zjarr. Izraelitët ishin kaq të frikësuar, sa filluan të dridheshin. I gjithë mali tronditej fuqishëm dhe ishte i mbuluar me tym. Tingulli i bririt bëhej gjithnjë e më i fortë. Pastaj Perëndia foli: «Unë jam Jehovai. Nuk duhet të adhuroni asnjë perëndi tjetër.»

Moisiu u ngjit përsëri në mal. Aty Jehovai i dha ligje për popullin se si ta adhuronin dhe si duhej të silleshin. Moisiu i shkroi ligjet dhe ua lexoi izraelitëve. Ata premtuan: «Do të bëjmë gjithçka që na kërkon Jehovai.» Po, ata i bënë një premtim Perëndisë. A do ta mbanin fjalën?