SIFUNDVO 23
Ema-Israyeli Enta Setsembiso KuJehova
Ngemuva kwetinyanga letimbili ema-Israyeli aphumile eGibhithe, ahlala ehlane laseSinayi. Jehova wabita Mosi watsi akenyukele entsabeni, wase utsi kuye: ‘Nikubonile loko lengakwenta kubantfu baseGibhithe. Nanitalilalelisisa livi lami, nigcine nesivumelwane sami, nitawuba yimphahla yami lekhetsekile.’ Ngako Mosi wehla wafike watjela ema-Israyeli konkhe Jehova lakushito. Atsini ema-Israyeli? Atsi: ‘Sitawukwenta konkhe loko Jehova lakushito.’
Mosi waphindze wenyukela kulentsaba. Jehova watsi kuye: ‘Ngelilanga lesitsatfu,ngitawukhuluma nani. Ubokwakhela labantfu imincele kuze bangenyukeli eNtsabeni iSinayi.’ Mosi wehla kulentsaba watjela ema-Israyeli kutsi akalungele kuva livi laJehova.
Ngemuva kwemalanga lamatsatfu, kwaba nekudvuma nemibani, lifu lelimnyama labonakala etikwentsaba. Kwase kuvakala licilongo likhala kakhulu. Jehova wase wehlela etikwalentsaba ngemlilo. Ema-Israyeli etfuka kakhulu futsi acala kwesaba. Lentsaba yatamatama kamatima futsi yagcwala intfutfu. Umsindvo wekukhala kwalelicilongo besewuvakala kakhulu. Nkulunkulu wabese utsi: ‘NginguJehova. Ungabi nalabanye bonkulunkulu ngaphandle kwami.’
Mosi waphindze wabuyela kulentsaba, futsi Jehova wamniketa imitsetfo lebekufanele ayitjele ema-Israyeli yekutsi kufanele amkhonte njani futsi atiphatse njani. Mosi wayibhala phansi lemitsetfo wase uyifundzela ema-Israyeli. Afunga atsi: ‘Konkhe loko Jehova lakushito sitimisele kukwenta.’ Enta setsembiso kuNkulunkulu. Kodvwa abetasigcina yini?
“Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.”—Matewu 22:37