Ěndịu dua wul᷊ang siměbang bọu Misirẹ̌, tau Israel nahumpạ su Wul᷊udu Sinai kụ nẹ̌kema sene. Yehuwa něngoro si Musa gunang sumaka sarang bul᷊udẹ̌ kụ nẹ̌bera si sie, ’Iạ seng něnal᷊amatẹ̌ tau Israel. Mạeng i sire masatia si Siạ kụ měkoạ parenta-Ku, i sire sarung makoạ tataghuaneng-Ku maarěga.’ Musa limintụ bọu wul᷊udẹ̌ kụ naul᷊ị su tau Israel apa niwerang i Yehuwa. Su tempong nakaringihẹ̌ ene, i sire simimbahẹ̌, ’I kami sarung měkoạ kěbị apa niorong i Yehuwa.’

Bọu ene, i Musa saụ simaka sarang bul᷊udẹ̌, kụ sene i Yehuwa naul᷊ị, ’Kate dua ěllo, Iạ sarung mẹ̌bisara si kamene. Paul᷊ị su tau Israel i sire tawe wotonge sumaka sarang Wul᷊udu Sinai.’ I Musa limintụ kụ něngoro tau Israel pẹ̌sasadia gunang dumaringihẹ̌ bawerang i Yehuwa.

Dua ěllo tuhụe, tau Israel nakasilo kilạ dingangu binawa maitung su wul᷊udẹ̌ ene. I sire lai nakaringihẹ̌ dělụ sěbạe maihạ dingangu tingihu terompet. Bọu ene, Yehuwa limintụ sarang bul᷊udẹ̌ ene su ral᷊ungu putung. Tau Israel gụgěguhẹ̌ ual᷊ingu sěbạe natakụ. Bul᷊udẹ̌ ene nělinuhẹ̌ sěbạe maihạ kụ natutu dingangu tipu. Tingihu terompet kakạihạe. Bọu ene Mawu nẹ̌bera, ’Iạ Yehuwa. I kamene tawe wotonge maněmbah mawu wal᷊inẹ.’

I Musa saụ simaka sarang wul᷊udẹ̌, kụ i Yehuwa něgělị hukung gunang tau Israel. Hukung ene nělahẹ kerea i sire harusẹ̌ měngibadah si Sie dingangu apa harusẹ̌ koateng i sire. Musa němohẹ hukung ene kụ nẹ̌basa ene su tau Israel. I sire nẹ̌diandi, ’I kami sarung měkoạ kěbị apa niorong i Yehuwa.’ Katewe, apa i sire sarung měkoạ apa seng nirianding i sire?