Nijanogne tambane i Vohy i Sinaỳ eo o Israelitao, roe volagne tafara ty nialà iareo ta Ejipta agne. Nampanganihe i Jehovah tamy i vohitsey ey ty Mosesy, le hoe reke: ‘Fa navotako o Israelitao.’ Naho mankatò ahy sady magnorike ty lalàko iareo, le ho filieko ho ahy manokagne. Nambara i Mosesy tamo o Israelitao zay. Le hoe iareo: ‘Hatao’ay ze raha ampanoe i Jehovah.’

Nimbam-bohitseo indraike ty Mosesy. Hoe ty Jehovah: ‘Hirehake ama’o raho naho afake telo andro. Rehafo o vahoakeo tsy hanganike etoy.’ Nizotso ty Mosesy, le nampiomagne iareo mba hitsanogne i Jehovah.

Nahatrea helatse naho rahogne mainte bey tamy i vohitsey ey o Israelitao, telo andro tafara izay. Naharey feon-kotroke naho antsiva iareo. Nisy afo nirehetse nizotso tamy i vohitsey ey sady tao ty Jehovah. Natahotse mafe o Israelitao, naho fa nahatrea i vohitsey feno setroke naho niezegnezegne. Nagneno mafe bey ka ty feo i antsivay. Hoe ty Andrianagnahare: ‘Izaho ro Jehovah. Ko mivavake amy ty andrianagnahare hafa nareo.’

Niheregne tagne indraike ty Mosesy. Nimea i Jehovah lalàna maro reke hagnoriha o vahoakeo ty fomba hanompoagne Aze. Sinora i Mosesy ze lalàna zay, le nivakie’e tamy iareo. Le hoe iareo: ‘Hatao’ay ze raha ampanoe i Jehovah.’ Hanoe iareo vata’e vao ze raha nampitamae iareo i Jehovah zay?