ʻI ha māhina nai ʻe ua hili ʻenau mavahe mei ʻIsipité, naʻe aʻu ʻa e kau ʻIsilelí ki Moʻunga Sainai ʻo fokotuʻu ai honau tēnití. Naʻe ui ʻa Sihova kia Mōsese, ke ne ʻalu hake ki he moʻungá, pea naʻá ne tala ange kiate ia: ‘Naʻá ku fakahaofi ʻa e kau ʻIsilelí. Kapau te nau talangofua kiate au pea tauhi ʻeku ngaahi laó, te nau hoko ko ʻeku kakai makehe.’ Naʻe foki hifo ʻa Mōsese ʻo tala ki he kau ʻIsilelí ʻa e meʻa naʻe tala ange ʻe Sihová. Naʻe fēfē ʻenau talí? Naʻa nau pehē: ‘Te mau fai ʻa e meʻa kotoa pē ʻoku tala mai ʻe Sihova ke mau faí.’

Naʻe toe ʻalu hake ʻa Mōsese ki he moʻungá. Naʻe pehē ange ai ʻe Sihova: ‘Te u talanoa mo koe ʻi he ʻaho ʻe tolu mei heni. Fakatokanga ki he kakaí ke ʻoua te nau feinga ke ʻalu hake ki Moʻunga Sainai. Naʻe ʻalu hifo ʻa Mōsese ʻo tala ki he kau ʻIsilelí ke nau teuteu ke fanongo kia Sihova.

ʻI he ʻaho ʻe tolu mei ai, naʻe sio ʻa e kau ʻIsilelí ki he tapa ʻa e ʻuhila mo ha konga ʻao fakapoʻuli ʻi he moʻungá. Naʻa nau toe fanongo ki he mana leʻo-lahi mo e ongo mai ha meʻaifi. Pea naʻe ʻalu hifo ʻa Sihova ki he moʻungá ʻi he afi. Naʻe ilifia ʻaupito ʻa e kau ʻIsilelí pea nau tetetete. Naʻe ngalulu lahi ʻa e moʻungá kotoa pea naʻe ʻufiʻufi ʻe he kohu. Naʻe ʻalu ke toe leʻo-lahi ange ʻa e ongo ʻo e meʻaifí. Pea naʻe pehē ʻe he ʻOtuá: ‘Ko au Sihova. Kuo pau ke ʻoua te mou lotu ki ha ngaahi ʻotua kehe.’

Naʻe foki hake ʻa Mōsese ki he moʻungá, pea naʻe ʻoange ʻe Sihova kiate ia ʻa e ngaahi lao ki he kakaí fekauʻaki mo e founga ʻoku totonu ke nau lotu ai kiate Iá mo e tōʻonga ʻoku totonu ke nau faí. Naʻe hiki ʻe Mōsese ʻa e ngaahi laó pea lau ki he kau ʻIsilelí. Naʻa nau palōmesi: ‘Te mau fai ʻa e meʻa kotoa pē ʻoku tala mai ʻe Sihova ke mau faí.’ ʻIo, naʻa nau fai ha palōmesi ki he ʻOtuá. Ka te nau fai ki ai?