Pati pajumpha pafupifupi myezi yiŵi kutuliya po Ayisraele angutaskikiya ku Egipiti, yiwu angufika ku phiri la Sinai ndipu anguzenga mahema ngawu kweniko. Yehova wangukambiya Mozesi kuti waluti pachanya pa Phiri ndipu wanguti: ‘Ndaŵataska Ayisraele. Asani andivwiyengi ndi kusunga marangu ngangu, ajengi ŵanthu ŵangu apade.’ Mozesi wangusika muphiri ndipu wangukambiya Ayisraele vo Yehova wangukamba. Kumbi yiwu angumukanji? Angumuka kuti: ‘Tichitengi vosi vo Yehova watikambiya kuti tichiti.’

Mozesi wanguluta so paphiri. Yehova wangukamba kuti: ‘Asani pajumpha mazuŵa ngatatu, ndikambisanengi namwi. Ukatcheŵeski ŵanthu kuti angazanga cha kufupi ndi Phiri la Sinai.’ Mozesi wangusika ndi kukambiya Ayisraele kuti anozgeke kuti azivwisiyi vo Yehova wakhumbanga kuŵakambiya.

Pati pajumpha mazuŵa ngatatu, Ayisraele anguwona limphezi liching’anima kweniso mtambu ufipa paphiri. Yiwu anguvwa kuliya kwa limphezi ndi mbata. Pavuli paki, Yehova wanguza paphiri lo mumotu. Ayisraele anguchita mantha ukongwa ndipu anjekemiyanga. Phiri losi lasukunyikanga ndipu lenga ndi josi. Kuliya kwa mbata kwasazgikiyangaku. Pavuli paki, Chiuta wanguti: ‘Ini ndini Yehova. Mungasopanga achiuta anyaki cha.’

Mozesi wanguwere paphiri ndipu Yehova wangumupasa marangu kuti wakapasi ŵanthu. Marangu yanga, ngenga ngakukwaskana ndi mo atenere kumusope kweniso kuchitiya vinthu. Mozesi wangulemba marangu ngenanga ndipu pavuli paki wanguŵerenge Ayisraele. Yiwu angulayizga kuti: ‘Tichitengi vosi vo Yehova watikambiya kuti tichiti.’ Ayisraele angulayizga kwaku Yehova. Kumbi yiwu angufiska vo angulayizga?