Nikwakayinda myeezi iibili nibakazwa kuEgepita, maIsrayeli bakasika kuChilundu chaSinayi alimwi bakakkala nkuko. Jehova wakabuzya Musa kuti atante kuchilundu, mpawo wakamubuzya kuti: ‘Ndakafutula maIsrayeli. Ikuti bandiswiilila akubamba milawu yangu, bayooba bantu mbindiyandisya.’ Musa wakaseluka akubuzya maIsrayeli Jehova nzyaakamubuzizye. Bakamvwiila kutyeni? Bakati: ‘Tuzoozichita zyoonse Jehova nzyatubuzya kuti tuchite.’

Musa wakabweeda lubo kuchilundu. Kali nkukooko, Jehova wakamubuzya kuti: ‘Ndiyanda kwaambuula anduwe kwamazuba atatu. Chenjezya bantu kuti batasweni afwiifwi aChilundu chaSinayi.’ Kuzwa waawo, Musa wakaseluka akubuzya maIsrayeli kuti balibambile kuswiilila makani aJehova.

Buzuba bwachitatu, maIsrayeli bakabona tulabi ajoba lisiya loko achilundu. Alubo bakamvwa kudilima akulila kwamweembo. Mpawo Jehova wakaselukila achilundu kali mumulilo. MaIsrayeli bakayoowa zyakuti bakakankama. Chilundu choonse chakali kuzuzuma ziyoosya alimwi chakavumbidwe abusi. Kulila kwamweembo kwakali kuya bukomenesya. Mpawo Leza wakati: ‘Ndime Jehova, utakombi bambi baleza.’

Musa wakatanta ajulu achilundu, mpawo Jehova wakamupa milawu iili atala abantu mbubakeelede kukomba Leza ambubakeelede kukkala. Musa wakayilemba milawu eeyo akwiibala kunembo lyamaIsrayeli. Mpawo bantu bakasyomezya kuti: ‘Tuzoozichita zyoonse Jehova nzyatubuzya kuti tuchite.’ Bakachita chisyomezyo kuli Jehova. Pesi bakali kuyoochizuzikizya na?