Abaisareri bakakora enkambi hansi y’Orusozi Sinai hanyuma y’ameezi abiri barugire Misiri. Yahwe aketa Musa kutemba haiguru ha rusozi yamugambira ati: ‘Nkajuna Abaisareri. Obu baranyorobera kandi bakahondera ebiragiro byange, nibaija kufooka ihanga ery’embaganiza.’ Musa akasirimuka hansi yagambira Abaisareri byona Yahwe eby’akaba amugambiire. Abaisareri bakagarukamu ki hanyuma ya Musa kubagambira byona Yahwe eby’akaba amutumire? Bakagarukamu bati: ‘Byona Yahwe eby’agambire nitwija kubikora.’

Musa akagarukayo ha rusozi. Yahwe akamugambira ati: ‘Omu biro bisatu, ninyija kubaza nainywe. Gambira abantu batalengaho kutemba Orusozi Sinai.’ Musa akasirimuka yagambira Abaisareri kwetekaniza kuhurra Yahwe ebyarukwija kubagambira.

Hanyuma y’ebiro bisatu, Abaisareri bakarora omurabyo hamu n’ekicu ekirukwiragura ha rusozi. Kandi bakahurra enkuba ey’amaani hamu n’iraka ly’engwara. Yahwe akasirimuka yaija ha rusozi omu murro. Abaisareri bakatiina muno batukumira. Orusozi rwona rukatengeta muno kandi rwaijura omwika. Iraka ly’engwara likeyongera kutokera haiguru. Ruhanga yagamba ati: ‘Ninyowe Yahwe. Mutaliramya abaruhanga abandi.’

Musa akagarukayo ha rusozi Yahwe yamuha ebiragiro ebikaba nibyoleka omulingo abantu bakaba basemeriire kumuramya n’omulingo bakaba basemeriire kwetwaza. Musa akahandiika ebiragiro binu hanyuma y’abisomera Abaisareri. Bakamuraganiza nibagamba ngu: ‘Nitwija kukora kyona Yahwe eky’araturagira kukora.’ Abaisareri bakaraganiza ngu nibaija kworobera ebiragiro bya Ruhanga. Baitu bakahikiriza ebi bayeragire?