Израильчилер Египеттен үнүпкеш, ийи хире ай эрткенде, Синай дагның чанынга турлагжып алганнар. Иегова Моисейни дагже кыйгырып алгаш: «Израильчилерни камгалаан мен. Мени дыңнап, хоойлуларымны сагыыр болза, олар мээң тускай чонум болур» — дээн. Моисей дагдан бадып келгеш, израильчилерге Иегованың сөстерин дамчыткан. Израильчилер харыызынга мынча деп аазаан: «Иегованың дилээни ёзугаар шупту чүүлдү кылыр бис».

Моисей катап дагже үне берген. Аңаа Иегова мынча дээн: «Үш дугаар хүнде сээң-биле чугаалажыр мен. Кым-даа Синай дагже чоокшулавас кылдыр дамчыт». Моисей дагдан бадып келгеш, израильчилерге: «Иегованы дыңнаарынга белен болуңар» — деп чугаалаан.

Үш дугаар хүнде израильчилер кызаңнаашкынныг кара булуттарның даг кырын хөме апканын көрген. Оон диңмирээшкин биле эдискиниң ыыткыр үнү дыңналган. Ынчан Иегова дагже отка бүргедипкен бадып келген. Дагның кыры ышталып, сириңейнип эгелээрге, эдискиниң үнү улгадып-ла орган. Израильчилер коргуп, сирилеп эгелээн. Ынчан Иегова мынча дээн: «Мен Иегова-дыр мен. Силер өске бурганнарга чүдүвес ужурлуг силер».

Моисей дагже чеде бээрге, Иегова аңаа хоойлулар берген. Ында Бурганга канчаар бараалгаарын база канчаар алдынарын бижээн болган. Моисей ол хоойлуларны бижип алгаш, израильчилерге номчуп берген. Олар: «Иегованың айытканы ёзугаар алдынар бис» — деп Бурганга аазаашкынын берген. Ынчалза-даа олар сөзүн ээлээн бе?