Ayniwan cheb u ta patil te kʼalal lokʼik ta Egipto te israeletike, kʼotik ta wits Sinaí sok la yakʼ skampamentoik tey-a. Jich yuʼun te Jehová la skʼanbey te Moisés te akʼa mouk bael ta wits-abi, jich la yalbey: “Joʼon la kakʼbey skolel te israeletik. Teme ya schʼuunbonik te jkʼop sok teme ya spas ta skuxlejalik te leyetik kuʼune, jaʼ nasion kuʼun ya xkʼot te mukʼ skʼoplale”. Te kʼalal ko tal ta wits te Moisés, la scholbey yaʼiy te israeletik te bin la yal te Jehovae. ¿Bin la yalik yuʼun? Jich la sutik: “Ya jpastik spisil te bin ya yalbotik te Jehová”.

Ta patil, chaʼmo bael ta wits te Moisés. Tey albot yuʼun-a te Jehová: “Liʼ ta oxeb kʼajkʼal ya xkʼopojon sok te lume. Altiklanbeya te manchuk ya xmoik tal ta wits Sinaí”. Te Moisés ko tal sok la yalbey te israeletik te akʼa schajpan sbaik ta yaʼiybeyel skʼop te Jehovae.

Ta yoxebal kʼajkʼal, te israeletik la yilik bayal tsantsewal sok ijkʼal tokal ta sba te witse. Soknix la yaʼiyik te tʼom tulan chawuk sok te tulan yokʼel xulubil. Ta patil, te Jehová ko tal ta wits ta yolil kʼajkʼ. Te israeletik bayal xiwik. Te wits potsot ta chʼail sok tulan yak ta nijkʼel. Te yokʼel te xulubil tulanxan toy moel. Te Jehová jich la yal: “Joʼon Jehovaon. Mame xa awichʼik ta mukʼ yantik diosetik”.

Te Moisés chaʼmo bael ta wits, tey-a te Jehová la yakʼ leyetik ta swenta te lume. Te leyetik-abi, la yal te bin-utʼil ya skʼan ya yichʼik ta mukʼ te Jehová sok te bin-utʼil ya skʼan ya xkuxinike. Te Moisés la stsʼibay sok la skʼoponbey yaʼiy te israeletike. La yalik ta jamal: “Ya jpastik spisil te bin ya skʼanbotik te Jehovae”. Jich yuʼun la yalbeyik ta jamal te Dios te ya spasike, pero ¿labal spasik?