Nga murahu ha miṅwedzi mivhili vho ṱuwa Egipita, Vhaisiraele vho swika Thavhani ya Sinai nahone vha atha madennde henefho. Yehova a amba na Mushe, we a gonya thavhani, a ri: ‘Ndo tshidza Vhaisiraele. Arali vha nthetshelesa nahone vha tevhedza milayo yanga, vha ḓo vha vhathu vhanga vho khetheaho.’ Mushe a tsa thavhani nahone a vhudza Vhaisiraele zwe Yehova a amba. Vho aravha hani? Vho fhindula vha ri: ‘Ri ḓo ita zwoṱhe zwine Yehova a ri vhudza zwone.’

Mushe a dovha a gonya thavhani. Henefho, Yehova a ri: ‘Ndi ḓo amba na inwi nga murahu ha maḓuvha mararu. Vhudzani vhathu uri vha songo lingedza u gonya Thavha ya Sinai.’ Mushe a tsa nahone a vhudza Vhaisiraele uri vha ḓilugiselele u pfa zwine Yehova a ḓo zwi amba.

Nga murahu ha maḓuvha mararu, Vhaisiraele vha vhona lupenyo na gole thavhani. Vha dovha vha pfa na mubvumo muhulu na phalaphala i tshi lila. Nga murahu Yehova a tsela kha thavha e kha mulilo. Vhaisiraele vha tetemela nga nyofho. Thavha yoṱhe ya dzinginyea zwihulu nahone yo tibedzwa kha vhutsi. Mubvumo wa phalaphala wa ṋaṋa u hula u tshi ya. Nga murahu Mudzimu a ri: ‘Ndi nṋe Yehova. Ni songo rabela miṅwe midzimu.’

Mushe a dovha a gonya thavhani nahone Yehova a mu fha milayo ine ya sumbedza nḓila ine vhathu vha tea u mu rabela ngayo na ine vha fanela u ḓifara ngayo. Mushe a ṅwala yeneyo milayo nahone a i vhalela Vhaisiraele. Vha fulufhedzisa vha ri: ‘Ri ḓo ita zwoṱhe zwine Yehova a ri vhudza zwone.’ Ee, vho fulufhedzisa Mudzimu. Naa vha ḓo zwi ita?