Israaˈeelati Gibxxeppe kiyi simmidi naaˈˈu agina gidiya wodiyaappe guyyiyan, Siinaa Deriyaa gakkidi dunkkaaniyaa dunkkaanidosona. Muusee deriyaa huuphiyaa kiyin, Yihooway a xeesidi hagaadan giis: ‘Taani Israaˈeelata ashshaas. Eti taayyo azazettikkonne ta higgiyaa naagikko, eti taayyo dumma asa gidana.’ Muusee deriyaappe wodhidi Yihooway yootidobaa Israaˈeelatussi odiis. Eti waatidonaa? Eti, ‘Yihooway yootidobaa ubbaa nuuni oottana’ yaagidosona.

Muusee zaarettidi deriyaa kiyiis. Yan, Yihooway hagaadan giis: ‘Heezzantto gallassi, taani nena haasayissana. Asay Siinaa Deriyaa pude kiyennaadan seera.’ Muusee duge wodhidi Israaˈeelati Yihooway yootiyoogaa siyanawu giigettanaadan odiis.

Heezzu gallassappe guyyiyan, Israaˈeelati wolqqanttay wolqqammiyoogaanne sikkida shaaraa deriyaa bolli beˈidosona. Qassi eti dadaa gunttaanne malkkataa cenggurssaa siyidosona. He wode Yihooway tamaara deriyaa bolli wodhiis. Israaˈeelati keehi yayyidi kokkoridosona. Deree muleera keehi qaaxxiisinne cuwan kamettiis. Malkkataa cenggurssay keehippe dari dari biis. He wode Xoossay, ‘Taani Yihoowa. Taappe attin, hara xoossassi goynnoppa’ yaagiis.

Muusee deriyaa zaarettidi kiyin, asay Yihoowayyo waanidi goynnana bessiyaakkonne waanidi deˈana bessiyaakko Yihooway higgiyaa Muusessi immiis. Muusee higgeta xaafiis; qassi guyyeppe hegaa Israaˈeelatussi nabbabiis. Eti, ‘Yihooway yootidobaa ubbaa nuuni oottana’ yaagidi qaalaa gelidosona. Ee, eti Xoossaayyo qaalaa gelidosona. SHin eti hegaa naaganee?