Kex dos meses jóokʼok le israelitaʼob tu luʼumil Egiptooʼ, kʼuchoʼob aktáan tiʼ u Puʼukil Sinaí yéetel tiʼ pʼáatoʼob jeʼeleliʼ. Jéeoba túuneʼ tu yaʼalaj tiʼ Moisés ka naʼakak teʼ puʼukoʼ. Tu yaʼalajtiʼ: ‹Teen salvart le israelitaʼoboʼ. Wa ku yuʼubikoʼob in tʼaan yéetel ku beetkoʼob baʼax ku yaʼalik in leyoʼobeʼ, yaan in yéeyikoʼob bey in kaajaleʼ›. Le ka éem Moisés tiʼ le puʼukoʼ, tu tsikbaltaj tiʼ le israelitaʼob le baʼax tu yaʼalaj Jéeobaoʼ. ¿Baʼax túun tu yaʼaloʼob? Tu yaʼaloʼob lelaʼ: ‹Yaan k-beetik tuláakal le baʼax ken u yaʼaltoʼon Jéeobaoʼ›.

Ka tsʼoʼokeʼ Moiseseʼ naʼak tu kaʼatéen teʼ puʼukoʼ. Teʼeloʼ Jéeobaeʼ tu yaʼalajtiʼ: ‹Ich tres díaseʼ yaan in tʼanik le kaajoʼ. Aʼaltiʼobeʼ bik táabakoʼob naʼakal tu Puʼukil Sinaí›. Ka éem Moiseseʼ tu yaʼalaj tiʼ le israelitaʼob ka u preparartubaʼob utiaʼal u yuʼubikoʼob baʼax ken u yaʼal Jéeoba.

Ka máan tres díaseʼ le israelitaʼoboʼ tu yiloʼob junpʼéel box múuyal teʼ puʼukoʼ bey xan u léembal cháak. Tu yuʼuboʼob xan u kíilbal cháak yéetel u kʼaʼam ustaʼal baakiʼ. Ka tsʼoʼokeʼ Jéeobaeʼ éem yóokʼol le puʼuk paʼteʼ yéetel kʼáakʼ. Le israelitaʼoboʼ jach sajakchajoʼob. Le puʼukoʼ joʼopʼ u sen butsʼilankil yéetel joʼopʼ u sen tíitkuba. Tsʼoʼoleʼ bin u maas kʼaʼamtal u yuʼubaʼal u juum le baakoʼ. Jéeoba túuneʼ tu yaʼalaj: ‹Teen Jéeoba. Maʼ unaj a adorartik uláakʼ diosoʼobiʼ›.

Moiseseʼ naʼak tu kaʼatéen teʼ puʼukoʼ, teʼeloʼ Jéeobaeʼ tu tsʼáaj leyoʼob tiʼ utiaʼal le kaajoʼ. Teʼ leyoʼobaʼ tu yaʼalaj tiʼ le israelitaʼob bix u kʼáat ka adorartaʼakoʼ yéetel bix le kuxtal unaj u biskoʼoboʼ. Moiseseʼ tu tsʼíibtaj le leyoʼobaʼ ka tsʼoʼokeʼ tu xokaj u yuʼub le israelitaʼoboʼ. Letiʼobeʼ tu yaʼaloʼob: ‹Yaan k-beetik tuláakal le baʼax ken u yaʼaltoʼon Jéeobaoʼ›. Bey túunoʼ, tu beetoʼob junpʼéel promesa tiʼ Dios. Chéen baʼaleʼ, ¿tu tsʼoʼokbesoʼob wa le baʼax tu yaʼaloʼoboʼ?