Adiwi ue fuo kura aYisaraere Ezipeta yo, i ada Bagangara Sinai yo na ki dua gayo bataya yo. Yekova ayambu Moize, Moize ki ndu kurii bagangara yo, na ki ya fuko: ‘Mi batasi aYisaraere. Ka i gisangba re na ki kakuti gimi andiko, i nika da ni gimi kparakpara aboro.’ Moize akaragatiko na ki pe gupai Yekova agumbaha re fu aYisaraere. Gayo karagapai angia gine? I akaragapai nga: ‘Ani nika manga agu apai dunduko Yekova nika gumbaha.’

Moize akaragatiko berewe kurii bagangara yo. Yekova ki ya fuko yo wẽ: ‘Mi nika fura namo fuo arame biata. Mo za aboro nga ka i yengo kurii Bagangara Sinai no ya.’ Moize akaragatiko na ki ya fu aYisaraere wẽ i mbakaditiyo tipa ka gia fugo Yekova.

Fuo aˈuru biata kusa, aYisaraere abi ikpirogumba na bibiri rungbutorungbuto mai rii bagangara yo. I agi woro gumba si ni sumbu na woro ambanya a. Fuani, Yekova ki ye rogo we yo kurii bagangara yo. AYisaraere aima gunde ni kerehe i ki tona ka kio. Bagangara naabaha atona ka zigizo tihe na ngime ki dadi he. Woro ambanya atona ka kio kina kumbatayo. Fuani, Mbori ki ya: ‘Mi nga Yekova. Si aidanga oni irisi gu kura mbori te.’

Moize akaragatiko berewe kurii bagangara yo, na Yekova ki fu andiko yo fuko ko fuhe fu aboro tipa i ini wai ka irisoko na wai si aida i nimangi apai. Moize akeke agu andiko re kusende na ki gedihe fu aYisaraere. I akidohe nga: ‘Ani nika manga agu apai dunduko Yekova nika ya ani mangihe.’ Nirengo, i akidohe fu Mbori. Ono boro i amangihe wo?