Kinde ma Musa ubino iwi got Sinai, Yehova uyero ire nia egier hema moko ma segi, nyinge bibedo hema mi cokiri, i hema maeno re ma nyithindho mir Israel gibitimo ire thier. Kwayu gibed giyei hema mi cokirine kakare ceke ma gibecidho i ie.

Yehova uyero kumae: ‘Yer ni dhanu nia gimii piny nimakere ku copo migi pi nigiero hema mi cokiri.’ Nyithindho mir Israel gimio mola ma kwar, mola ma tar, mola, man kidi ma i upal. Gimio bende bongu mi yuk rombe, bongu ma nwang’, adila man piny mange de. Gimio piny lee dit uketho Musa ujukogi kumae: ‘Eromo! Kud wukel piny mange.’

Jumaco man jumamon dupa ma weg bodho gimiyiri pi nigiero hema mi cokiri. Yehova umio igi rieko pi timo tije, pieno jumoko caku yiko uzi, jumange ke caku cwie ni bongu kunoke niketho rangi i kume. Jumoko uyiko kidi, jumange uyiko mola ma kwar, jumange ke uyiko bau.

Nyithindho mir Israel gigiero hema mi cokiri tap calu ma Yehova uyero igi. Giyiko ridho ma dit pi nipoko i hemane ni ario: Kamaleng’ ku Kamaleng’ m’usagu. I Kamaleng’ m’usagu, giketho sanduku mi lembariba ma juyiko ku yen magasia, man juwiro kume ku mola ma kwar. I Kamaleng’, giketho thetala ma juyiko ku mola ma kwar, meza, man pemblam mir udok ma ng’wice ng’ar. I lela, giketho galai ma juyiko ku mola man pemblam ma dit. Sanduku mi lembariba ubed upoyo wi nyithindho mir Israel i kum lembe ma ging’olo ni Yehova. Nyo ing’eyo nia lembariba utie  girang’o? Lembariba utie lembe moko masegi ma ng’atini ng’olo nia ebitimo.

Yehova ung’io Harun man wote re ma gibed julam man gitim i hema mi cokiri. Gicikiri nigwoko hemane man nithiero lam ni Yehova i ie. Harun m’ubino jalam ma dit re m’ubed umondo i Kamaleng’ m’usagu. Ebed emondo kuca wang’ acel kubang’ oro pi nithiero lam pi dubo pare, pi dubo mi juruot pare man pi dubo mi thek mir Israel zoo.

Nyithindho mir Israel gidaru hema mi cokiri i ng’ei oro acel niai ma giwok kud i Misiri. Kawoni dong’ gitie ku kaka ma gicopo woro ie Yehova.

Yehova ugam upong’o hemane ku dwong’ pare man eketho afuru ubedo i wie. Pi nindo ceke ma fodi afuru ucungo iwi hema, nyithindho mir Israel gibed gicoko ngo woth ku kaka ma gigonjo i ie. Ento kan afuru uai kud iwi hema, ging’eyo ndhu nia eno tie saa m’ukwayu gicok ie woth. Gigam giyaku hemane, man gilubo tok afuru.