Moisesajj Sinaí qollunkaskäna ukhajja, ‘mä tabernáculo luram’ sasaw Jehová Diosajj säna. ¿Kunas tabernáculo satänjja? Israelitanakan Diosar adorapjjañapatak mä carpaw ukham satäna. Kawkirutï sarapkäna ukaruw uka carpa apapjjañapäna.

Jehová Diosajj Moisesar akham sänwa: ‘Tabernáculo lurañatakejj kuntï puedepki uk israelitanakajj apanipjjpan’ sasa. Ukatwa qori, qollqe, cobre, suma qalanaka, joyanaka, tʼarwanaka, linot lurat suma hilonaka, suma lipʼichinaka, kunaymaninak apapjjäna. Waljpun apapjjäna, ukatwa Moisesajj ‘jan apanjjapjjamti, waljaw utj-jje’ sasin säna.

Tabernáculo lurañjja, yatjjattʼat walja chachanakampi warminakampiw yanaptʼapjjäna. Sum lurapjjañapatakejj Jehová Diosaw yatiñ churäna. Yaqhepajj qapupjjänwa, sawupjjänwa, bordapjjarakïnwa. Yaqhepasti qorimpiw trabajipjjäna, qalanak kʼutsupjjäna, jan ukajj maderanak khitsupjjäna.

Kunjamtï Diosajj siskäna ukhamwa tabernáculo carpa lurapjjäna. Uka carpa pä cuartor jaljañatakejja, mä suma cortina lurapjjäna, mä cuartojj Santo satänwa, mayasti Santísimo satarakïnwa. Santisimonjja pactor mantat arcaw ukankäna, uka arcajj acacia maderampi qorimpi luratänwa. Santo sat cuartonsti, qorit lurat candelabrompi, mä mesampi, incienso nakhayañatak mä altarampiw utjäna. Pationsti cobret lurata mä jachʼa fuentempi, mä jachʼa altarampiw utjäna. Israelitanakajj ‘istʼapjjapunïmawa’ sasaw Jehová Diosar sapjjäna. Pactor mantat arcaw uka promesap  amtayäna. ¿Kunas mä pactojja? Promesanak phoqañatak mä acuerdor mantañawa.

Jehová Diosajja, tabernaculon sacerdotjam servipjjañapatakejj Aaronampiru yoqanakapampiruw ajllïna. Jupanakaw uka carpa sum cuidapjjañapäna, ofrendanaksa Jehová Diosar loqtapjjañapäna. Santisimorojj Aaronakiw jachʼa jilïr sacerdotjamajj mantañapäna. Maran mä kutikiw jupana, familiapan juchapata, ukhamarak israelitanakan juchapat mä sacrificio loqtañatak mantirïna.

Egiptot mistunipkäna ukhat mä maratwa tabernáculo lurañ tukuyapjjäna. Jehová Diosar adorañatak mä lugarajj utj-jjänwa.

Jehová Diosajja, uka tabernáculo uñjasajj wal kusisïna, ukatwa uka patjjar mä qenaya saytʼayäna. Qenayajj tabernáculo patjjankaskäna ukhajja, israelitanakajj pachpan quedasipjjäna. Onjjtäna ukhasti yaqha cheqar sarjjañ horasätapwa amuyapjjäna. Tabernáculo jarthapisajj uka qenayaruw arkapjjäna.