Kɛ Moizi o Sinai oka’n su lɔ’n, Zoova seli i kɛ maan Izraɛlifuɛ mun be kplan tannin sua kun naan be su i nun. Lika kwlaa nga bé kɔ́’n, bé fá tannin sua’n bé kɔ́.

Zoova seli Moizi kɛ: ‘Se Izraɛlifuɛ mun kɛ be man like naan be fa kplan tannin sua’n.’ Izraɛlifuɛ mun be mannin sika ɔkwlɛ, nin jɛtɛ ufue, nin aaba, ɔ nin yɔbuɛ kpakpa mun, yɛ asunmanndi nin kɔmin ɲanman mun. Asa ekun’n, be mannin nnɛn ndrɛ, nin lɛn tannin, nin nnɛn kplo, ɔ nin ninnge uflɛ wie mun ekun. Ninnge nga be mannin’n sɔnnin kpa. I sɔ’n ti’n, Moizi seli be kɛ: ‘W’a yo kpa sɔ. Nán amun man like kun.’

Yasua nin bla kpanngban be kplannin Ɲanmiɛn i tannin sua’n wie. Zoova mannin be ngwlɛlɛ naan b’a kwla di junman sɔ’n. Wie mun be toli jese yɛ wie mun be wuli tannin mun, kpɛkun be yili be nun desɛn klanman kpa. Wie mun be sɛli yɔbuɛ nin waka mun. Yɛ wie mun be tɔnnin sika ɔkwlɛ.

Izraɛlifuɛ mun be niannin ndɛ nga Zoova kannin’n su sɛsɛsɛ yɛ be kplannin tannin sua’n niɔn. Be fali tannin klanman kpa kun be kpɛli sua’n nun nɲɔn. Be flɛli sua ba klikli’n kɛ Sua ba m’ɔ ti Ɲanmiɛn liɛ klonglo’n, yɛ be flɛli sua ba nɲɔn su’n kɛ Sua ba ngunmin kun m’ɔ ti Ɲanmiɛn liɛ klonglo’n. Aenguɛ’n i alaka mɔ be fali sika ɔkwlɛ nin akasia waka’n be yoli’n, ɔ o Sua ba nɲɔn su’n nun. Sua ba klikli’n nun lɔ’n be sieli sika ɔkwlɛ kannin kun, ɔ nin tabli kun nin ansan yrawlɛ kun. Tannin sua’n i awlo’n i klun lɔ’n be sieli aaba kpongbo kun, ɔ nin tɛ yiwlɛ dan kun. Kɛ  Izraɛlifuɛ mun be wun aenguɛ’n i alaka’n, be wla kpɛn ndɛ nga be kan kleli Zoova’n su. ?A si ndɛ nga be kan kleli Zoova’n? Be seli i kɛ bé sú i titi.

Zoova fali Aarɔn nin i mma mun naan be yo i ɲrun jranfuɛ tannin sua’n nun lɔ. Be nian tannin sua’n i lika, kpɛkun be yi tɛ be man Zoova. Aarɔn yɛ ɔ ti Ɲanmiɛn ɲrun jranfuɛ dan’n niɔn. I kunngba cɛ yɛ ɔ kwla wlu Sua ba ngunmin kun m’ɔ ti Ɲanmiɛn liɛ klonglo’n i klun lɔ-ɔ. Afuɛ nuan kun nun’n ɔ wlu lɔ kpɛ kunngba, ɔ ko yi i bɔbɔ nin i awlofuɛ mun, ɔ nin Izraɛlifuɛ mun be sa tɛ mun be ti tɛ.

Kɛ Izraɛlifuɛ mun be jasoli Ezipti lɔ mɔ afuɛ kun sinnin’n yɛ be wieli Ɲanmiɛn i tannin sua’n i kplan-ɔn. Siɛn’n, be le lika kun mɔ be kwla su Zoova nun’n.

Zoova i aɲrunɲan’n fali tannin sua’n, kpɛkun like kɛ sin wɛnsrɛn sa fiteli tannin sua’n i ti su nglo. Sɛ sin wɛnsrɛn’n tumɛn i bo’n, Izraɛlifuɛ mun be kɔman be ɲrun. Sanngɛ kɛ ɔ tu i bo’n, nn be su kɔ. Kɛ bé kɔ́’n, be fa Ɲanmiɛn i tannin sua’n.