Ilyo Mose ali pa Lupili lwa Sinai, Yehova amwebele ukukuula icikuulwa icaibela ico baleita abati icikuulwa ca mushilo, umo abena Israele baali no kulapepela Lesa. Abena Israele baali no kulasenda icikuulwa ca mushilo konse uko baya.

Yehova atile: ‘Eba abantu bapeele ubupe pa kuti bakuule icikuulwa ca mushilo.’ Abena Israele balitwele golde, silfere, umukuba, amabwe ayasuma sana ne fibekobeko. Na kabili balitwele insalu ishisuma, impapa sha nama e lyo ne fintu fimbi. Balitwele ifintu ifingi sana ica kuti Mose abebele ati: ‘Lekeni ukuleta ifintu pantu ifyo muletele nafifula!’

Abaume na banakashi abengi abaishibe ifya kupanga ifintu, e bakuulile icikuulwa ca mushilo. Yehova alibapeele amano pa kuti babombe umulimo. Bamo balepikula no kubila ifya kufwala. Bambi balelepula amabwe, balepanga ifipe fya golde e lyo bambi balepanga ifipe fya fimuti.

Abantu bakuulile icikuulwa ca mushilo ukulingana ne fyo Yehova abebele. Balipangile insalu iisuma nga nshi iyo babikile pa kati, iyayakenye Umuputule uwa Mushilo e lyo no muputule wa Mushilo Nga Nshi. Mu Muputule wa Mushilo Nga Nshi e mwali icipao ca cipangano, bacipangile ne fimuti fya mushita na golde. Mu Muputule wa Mushilo babikilemo ilampi ilya golde, itebulo, ne ciipailo apo baleocela ifyanunkila. Mu lubansa lwa cikuulwa ca mushilo mwali ica kubikamo amenshi ico bapangiile no mukuba ne ciipailo icikalamba. Icipao ca cipangano calelenga abena Israele baleibukisha ifyo balaile Yehova.  Bushe icipangano walicishiba? Icipangano bulayo ubwaibela.

Yehova asalile Aarone na bana bakwe ukuba bashimapepo no kulabombela pa cikuulwa ca mushilo. Balingile ukulacisunga bwino kabili epo bali no kulatuulila amalambo kuli Yehova. Aarone, shimapepo mukalamba e o basuminishe fye ukulaingila mu Muputule uwa Mushilo Nga Nshi. Aleingila muli uyu muputule umuku umo fye mu mwaka ku kutuula amalambo pa membu shakwe, pa membu sha lupwa lwakwe e lyo ne sha bena Israele bonse.

Pa kuti abena Israele bakuule ici cikuulwa palipitile umwaka umo ukutula apo bafumiine mu Egupti. Ilyo bapwile ukukuula e lyo bakwete icikuulwa umwa kupepela Yehova.

Ikumbi lyaishile pa cikuulwa ca mushilo, no bukata bwa kwa Yehova bwaiswile mu cikuulwa ca mushilo. Ikumbi nga talimine pa cikuulwa ca mushilo, abena Israele tabalefuma pa cifulo apo bali. Lelo ikumbi nga lyaima, baleima no kutampa ukwenda. Balepangulula icikuulwa ca mushilo no kukonka ukwaleya ikumbi.