Cheʼ bʌ Moisés yaʼan ti wits Sinaí, Jehová tiʼ sube chaʼan miʼ mel (pʌt) jumpʼejl tabernáculo. Tsiʼ meleyob ti pisil bʌ otot i yaʼʌch tsiʼ chʼujutesayob Dios. Cheʼ jaʼel, tsiʼ chʼʌmʌyob majlel jiñi tabernáculo baqui jach tsaʼ majliyob.

Jehová tsiʼ yʌlʌ: «Suben jiñi israelob chaʼan miʼ coltañob i bʌ tiʼ melol jiñi tabernáculo i yom miʼ yʌcʼob chuqui añob i chaʼan». Tsiʼ yʌcʼʌyob oro, plata, cobre, utsʼatax bʌ xajlel (tun), ujʌl, i pʌchʌlel tiñʌmeʼ, lino bʌ pisil, i pʌchʌlel añimal tac yicʼot yan tac bʌ. Tsiʼ wen acʼʌyob i chubʌʼan, jin chaʼan Moisés tiʼ subeyob: «Jasʌlix iliyi. Maʼañix chuqui yom mi laʼ chʼʌm tilel».

Cabʌl tsiʼ chaʼleyob coltaya chaʼan miʼ mejlel jiñi tabernáculo. Jehová tsiʼ yʌqʼueyob i ñaʼtʌbal chaʼan utsʼat miʼ melob. Tsiʼ chajpayob puy tac chaʼan miʼ jochʼob pisil, tsiʼ cʼʌñʌyob oro yicʼot teʼ tac, tsiʼ topʼoyob xajlel tac yicʼot tsiʼ lʌtsʌyob.

Tsiʼ meleyob jiñi tabernáculo cheʼ bajcheʼ tsiʼ yʌlʌ Jehová. Tsiʼ meleyob cʼoʼtajax bʌ cortina chaʼan miʼ tʼoxtʌl jiñi tabernáculo ti Chʼujul bʌ Ajñibʌl yicʼot ti Cʼax Chʼujul bʌ. Yaʼ ti Cʼax Chʼujul bʌ Ajñibʌl yaʼan jiñi Arca chaʼan trato melbil bʌ ti acaciateʼ yicʼot oro. Yaʼ ti Chʼujul bʌ Ajñibʌl an jumpʼejl lámpara melbil bʌ ti oro, jumpʼejl mesa yicʼot panteʼ baʼ miʼ pulel jiñi pom. Yaʼ tiʼ pat an jumpʼejl i yajñib jaʼ melbil bʌ ti cobre yicʼot colem bʌ pulʌntib. Cheʼ bʌ miʼ qʼuelob jiñi Arca chaʼan pacto, miʼ cʼajtesañob jiñi tʼan tsaʼ bʌ i yʌqʼueyob Jehová. ¿A wujil ba chuqui  jumpʼejl trato? Jumpʼejlʌch tʼan muʼ bʌ la cʌqʼuen yambʌ.

Jehová tsiʼ yajca Aarón yicʼot i yalobilob chaʼan miʼ sujtelob ti motomaj yicʼot chaʼan miʼ chaʼleñob eʼtel (troñel) yaʼ ti tabernáculo. Yom miʼ cʌntañob yicʼot yom miʼ yʌqʼueñob i majtan Jehová. Cojach Aarón, jiñi Ñuc bʌ Motomaj, miʼ mejlel ti ochel yaʼ ti Cʼax Ñuc bʌ Ajñibʌl. Junsujtel jach miʼ yochel ti jumpʼejl jab chaʼan miʼ yʌcʼ pulbil bʌ majtañʌl tiʼ caj i mul, tiʼ caj i chaʼan i familia yicʼot tiʼ caj i chaʼan jiñi israelob.

Tsaʼ ujti i melob jiñi tabernáculo cheʼ bʌ añix jumpʼejl jab tsaʼ loqʼuiyob ti Egipto. Añix baqui miʼ mejlel i chʼujutesañob Jehová.

Jehová tsiʼ yʌcʼʌ ti jubel tocal yaʼ tiʼ pam jiñi tabernáculo i tsiʼ butʼu tiʼ ñuclel. Cheʼʌch tsiʼ pʌsʌ i tijicñʌyel Jehová bajcheʼ jiñi. Mi maʼañic miʼ ñijcan i bʌ jiñi tocal, jiñi israelob maʼañic miʼ ñijcañob i bʌ jaʼel. Pero mi tsaʼ cʼʌjqui jiñi tocal, yom miʼ majlelob ti yambʌ parte. Miʼ chejob jiñi tabernáculo i miʼ tʼuñob majlel jiñi tocal.