Ka Musa to Sinayi kulu kan, Jehova y’a fɔ a ye ko a ka fanibugu dɔ dilan, min be dan na tɔɔw la. O yɔrɔ la, Israɛldenw tun bena se k’ale bato. U tun bena se k’o fanibugu ɲun ka taga n’a ye u ka tagama na.

Jehova ko: ‘Jama be se ka min di walisa ka fanibugu nin dilan, a fɔ u ye u k’o di.’ Israɛldenw ye sanu, warigwɛ, ziranɛgɛ, kabakuru sɔngɔ gwɛlɛw ani kɔnɔkisɛw di. U ye sii, lenfu jese, bɛgɛn golow ani fɛɛn caaman wɛrɛw di fana. U ye fɛɛn caaman di fɔɔ Musa y’a fɔ u ye ko: ‘ A’ y’a to ten! Aw kana na ni foyi ye tugun.’

Cɛɛw ni muso hakilitigi caaman y’u niin don fanibugu baara la. Jehova ye lɔnniya di u ma k’o baara kɛ. Dɔw ye paratali kɛ, dɔw ye jese dan, wala ka boroderi kɛ. Dɔ wɛrɛw ye kabakuru baara kɛ, dɔw ye sanu baara kɛ wala ka yiri lɛsɛ.

Jehova tun ko u ka fanibugu dilan cogo min na, jama y’o lo kɛ jaatika. U ye cɛtigɛfani cɛɲumanin dɔ dilan walisa ka fanibugu tilan fila: Yɔrɔ Senuman ani Yɔrɔ Senuman Senuman. Layidu tagamasiɲɛ kɛsu tun be yen Yɔrɔ Senuman Senuman. A tun dilanna ni akasiyayiri ani sanu ye. Fitinɛ ni tabali tun be yɔrɔ Senuman kɔnɔ. Sarakabɔlan fana tun be yen walisa ka wusulan jɛni. Tasaba ziranɛgɛlaman ani sarakabɔlanba dɔ tun be lukɛnɛ na. Layidu tagamasiɲɛ kɛsu tun be Israɛldenw hakili jigi  k’u ye layidu ta ko u bena mɛnni kɛ Jehova fɛ. I b’a lɔn layidu ye min ye wa? O ye k’i daa di koo sɔbɛ dɔ la.

Jehova ye Arɔn n’a dencɛw sugandi k’u kɛ sarakalasebagaw ye. U tun bena fanibugu ladon ani ka sarakaw bɔ Jehova ye o yɔrɔ la. Arɔn tun ye sarakalasebagaw kuntigi ye. Ale dɔrɔn lo tun be se ka don Yɔrɔ Senuman Senuman kɔnɔ. A tun b’o kɛ siɲɛ kelen saan kɔnɔ walisa ka saraka bɔ ale, a somɔgɔw ani Israɛl siya bɛɛ ka jurumuw kosɔn.

Saan kelen u bɔnin kɔ Ezipiti, Israɛldenw ye fanibugu dilan ka ban. Sisan u ye yɔrɔ sɔrɔ walisa ka Jehova bato.

Jehova ka nɔɔrɔ ye fanibugu fa ani a y’a kɛ sankaba dɔ jigira a kun na. Sankaba tun mana to fanibugu sanfɛ fɔɔ wagati min na, Israɛldenw fana tun be to u nɔɔ na. Nka, ni sankaba tun wulila, u tun b’a faamu ko u taga wagati sera. U tun be fanibugu walaka k’a ɲun ka tugu sankaba kɔ.