Be ni Mose yɔɔ Sinai Gɔŋ lɛ nɔ lɛ, Yehowa kɛɛ lɛ akɛ efee mama tsũ ko ni yɔɔ srɔto kwraa, koni Israelbii lɛ ajá Nyɔŋmɔ yɛ jɛmɛ. Atsɛɔ mama tsũ nɛɛ sɔlemɔ buu. Yehowa hã Israelbii lɛ fee sɔlemɔ buu lɛ bɔ ni amɛbaanyɛ amɛkɛya he fɛɛ he ni amɛbaaya.

Yehowa kɛɛ Mose akɛ: ‘Kɛɛmɔ maŋbii lɛ ni amɛtsu onia koni akɛfee sɔlemɔ buu lɛ.’ Israelbii lɛ kɛ shika tsuru, jwiɛtɛi, akɔɔble, ojarawa tɛi, kɛ jwinei ba koni akɛfee mama tsũ lɛ. Amɛkɛ kooloi ahetsɔi, mama yɛŋ, kooloi ahewoji, kɛ nibii krokomɛi hu ba. Amɛkɛ nibii lɛ ba aahu akɛ, Mose kɛɛ amɛ akɛ: ‘Efa! Nyɛkɛ nibii lɛ eko akabaa dɔŋŋ.’

Hii kɛ yei babaoo ni he esa ye amɛbua kɛfee sɔlemɔ buu lɛ. Yehowa hã amɛ nilee ni amɛkɛtsu nitsumɔ lɛ. Amɛteŋ mɛi komɛi fee kpãa, mɛi komɛi kɛ kpãa lɛ fee mama, ni mɛi komɛi hu kɛ mama lɛ fee mama tsũ lɛ. Mɛi komɛi bua tɛi anaa, mɛi komɛi hu kɛ shika tsuru tsu nii, ni mɛi komɛi hu tsu kapinta.

Israelbii lɛ fee sɔlemɔ buu lɛ bɔ ni Yehowa tsɔɔ amɛ lɛ pɛpɛɛpɛ. Amɛfee pateeshɛŋ loo mama agbo fɛfɛo ko ni amɛkɛja sɔlemɔ buu lɛ mli. Atsɛɔ fã kome akɛ He Krɔŋkrɔŋ lɛ, ni atsɛɔ fã kroko lɛ akɛ, He Krɔŋkrɔŋ Fe Fɛɛ lɛ. Kpaŋmɔ adeka lɛ ma He Krɔŋkrɔŋ Fe Fɛɛ lɛ. Akasia tso kɛ shika tsuru akɛfee kpaŋmɔ adeka lɛ. Kanetso ni akɛ shika tsuru fee, okpɔlɔ, kɛ tsofa-kɛ-ŋmashãa latɛ yɛ He Krɔŋkrɔŋ lɛ. Okpolu ni akɛ akɔɔble  fee, kɛ afɔleshãa latɛ agbo yɛ sɔlemɔ buu lɛ kpo lɛ nɔ. Kpaŋmɔ adeka lɛ kai Israelbii lɛ akɛ, amɛwo Yehowa shi akɛ amɛbaabo lɛ toi. Ani ole nɔ ni kpaŋmɔ ji? Eji shiwoo krɛdɛɛ ko.

Yehowa hala Aaron kɛ ebihii lɛ ni amɛsɔmɔ akɛ osɔfoi yɛ sɔlemɔ buu lɛ mli. Amɛkwɛ sɔlemɔ buu lɛ nɔ, ni amɛshã afɔlei amɛhã Yehowa yɛ jɛmɛ. Aaron sɔmɔ akɛ osɔfonukpa, ni lɛ pɛ eyaa He Krɔŋkrɔŋ Fe Fɛɛ lɛ. Eyaa jɛmɛ shi kome daa afi. Kɛ́ etee lɛ, eyashãa afɔle yɛ lɛ diɛŋtsɛ ehe eshai, eweku lɛ he eshai, kɛ Israel maŋ muu lɛ fɛɛ he eshai ahewɔ.

Israelbii lɛ fee sɔlemɔ buu lɛ amɛgbe naa be ni amɛshi Ejipt lɛ sɛɛ afi. Agbɛnɛ, amɛná he ko ni amɛbaajá Yehowa yɛ.

Yehowa hã enunyam lɛ yi sɔlemɔ buu lɛ obɔ, ni atatu ko bahi sɔlemɔ buu lɛ nɔ. Kɛ́ atatu lɛ wó ehe nɔ yɛ sɔlemɔ buu lɛ nɔ lɛ, Israelbii lɛ toɔ amɛnibii, amɛfamɔɔ sɔlemɔ buu lɛ, ni amɛnyiɛɔ atatu lɛ sɛɛ. Shi kɛ́ atatu lɛ wóoo ehe nɔ yɛ sɔlemɔ buu lɛ nɔ lɛ, amɛhiɔ he ni amɛyɔɔ lɛ nɔŋŋ.