Uf em Berg Sinai git Jehova em Moses de Uftrag, es ganz bsundrigs Zelt für d Abetig z baue. Dem Zelt seit mer Stiftshütte. Und si isch eso gmacht, dass mer si uf d Reis cha mitneh.

Jehova seit zum Moses: «Säg em Volk, dass jede das söll gee, wo er cha, zum d Stiftshütte z baue.» Da bringed d Israelite Gold, Silber, Chupfer, Edelstei und Schmuck. Si gend au Wolle, Liine, Fell und vil anderi Sache. Si gend di Sache gern und schenked eso vil, dass de Moses irgendeinisch muess säge: «Ihr müend nüt meh bringe, mer hend gnueg.»

Vil handwerklich begabti Männer und Fraue helfed bim Baue vo de Stiftshütte mit. Jehova hilft ihne debii, so dass si no gschickter werded bim Schaffe. Di einte tüend Stoff webe und en nachher besticke, anderi schaffed mit Gold, wertvolle Stei oder Holz.

D Israelite baued d Stiftshütte genau eso, wies Jehova ihne seit. Für de Vorhof mached si es Becki us Chupfer und en grosse Altar. Nachher mached si en schöne Vorhang, wo d Stiftshütte i zwei Rüüm teilt. De Ruum uf de einte Siite heisst s Heilige und de Ruum uf de andere Siite heisst s Allerheiligschte. Im Heilige staht en grosse goldige Lüüchter, en Tisch und en Räucheralter. Im Allerheiligschte staht e Trueh us Akazieholz und us Gold. Dere Trueh seit mer Bundeslade. Weisch du, was en Bund isch? Es isch es bsundrigs Verspreche. Und d Bundeslade tuet d Israelite dra erinnere, dass si versproche hend, immer uf Jehova z lose.

Jehova wählt de Aaron und sini Söhn als Prieschter us. Ihri Ufgab isch es, zu de Stiftshütte z luege und für Jehova z opfere. Nume de Aaron, wo de Hohe Prieschter isch, dörf einisch im Jahr is Allerheiligschte ine gah. A dem Tag tuet er spezielli Opfer für Jehova bringe und Jehova um Vergebig bitte; für sini eigete Sünde, für d Sünde vo de Prieschter und für d Sünde vo allne Israelite.

Es Jahr nachdem d Israelite us Ägypte use sind, isch d Stiftshütte fertig. Jetzt hend si en Ort für d Abetig vo Jehova.

Jehova zeigt ihne, dass er sehr Freud a de Stiftshütte het und macht drum, dass e Wolke drüber erschiint. Solang d Israelite d Wolke über de Stiftshütte gsehnd, bliibed si am gliiche Ort. Aber wenn d Wolke ufstigt, isch es Ziit zum Wiitergah. Denn baued si d Stiftshütte ab und laufed de Wolke nache.