Wanaa sümaa chajachin Moisés saaʼu tü uuchikat Sinaí, nuluwataain nia Jeʼwaa sünain akumajaa wanee piichi aʼwaajülee. Tia süpülajatü nuʼwaajünüin Jeʼwaa natuma na israeliitakana. Atsajünawalinjatü süpüla nalüʼüjain shia noʼunajanapa.

Müshi Jeʼwaa nümüin Moisés: «Püma namüin na israeliita asülajakana tü eekat süpüla nasülajüin sukumajünaiwa tü piichi aʼwaajüleekat». Naapaka na israeliitakana ooro, pülaata, cobre, ipa kojutusü jee korolo kojutusü. Nasülajüin laana, lino, süta mürüt jee waneirua kasa. Wainma kasa nasülajüin, nnojoishii jeʼiyein naya, müshijeseʼe nümüin Moisés namüin: «Kettaajeerü sümaa tüü, wainmaitpa maʼin tü jüsülajakat».

Eeshii tooloyuu otta jieyuu akaaliinjaka sünain akumajaa tü piichi aʼwaajüleekat. Naapüin Jeʼwaa kekiiwaa namüin süpüla anain maʼin sukumajia natuma. Eeshii eeka nasuttajüliin, naʼyapüjüliin otta nasonuliin. Eeshii na süpüʼüyakana ooro, na akumajakana kasa süka ipa otta na akumajaka kasa süka taapüla.

Nakumajüin na israeliitakana tü piichi aʼwaajüleekat maʼaka nuluwataain shia Jeʼwaa. Nakumajüin wanee kuluulu miyoʼu anachonsü maʼin süpüla piamainjatüin sütaüjia tü piichikat. Sünülia tü paü shiinaluʼukat, «Nümülatuʼu Maleiwa» münüsü otta sünülia tü palajatkat paü «Nüʼütpaʼa Maleiwa» münüsü. Suluʼu tü paü «Nümülatuʼu Maleiwa» münakat, eejatü tü jurasükeetkat, aainjuushi süka wunuʼu acacia otta süka ooro. Suluʼu tü paü «Nüʼütpaʼa Maleiwa» münakat, eejatü wanee ranpara aainjuushi süka ooro, wanee meesa otta wanee aʼajülee wunuʼu jemeta eejuut, oʼoojiruushi süka ooro. Eejatü wanee aʼajülee mürüt chaa paatialuʼu jee wanee oʼlojia aainjuushi süka cobre. Wanaa sümaa neʼrüin na israeliitakana tü  jurasükeetkat, sotusü naaʼin napansaajüin nanüiki nümüin Jeʼwaa.

Nüneeküin Jeʼwaa Aarón otta na nüchonniikana Aarón süpüla sacerdootein naya suluʼu tü piichi aʼwaajüleekat. Nayainjana aaʼinmajaka tia jee aʼajaka mürüt nümüin Jeʼwaa. Nia Aarón chi laülaakai napüleerua na sacerdootekana otta nia ekerotuinjachika nümüiwaʼa suluʼu tü paü «Nümülatuʼu Maleiwa» münakat. Uwatua juyawai, aʼajüshi Aarón mürüt nümüin Jeʼwaa saaʼu naainjala, saaʼu naainjala nüchonnii jee saaʼu naainjala na israeliitakana.

Kettaasü natuma na israeliitakana tü piichi aʼwaajüleekat Maleiwa wanee juya süchikijee nojuʼitüin Egiptojee. Eeitpa wanee piichi süpüla naʼwaajüin Jeʼwaa.

Ashakatüsü nüpülain Jeʼwaa saaʼu tü piichi aʼwaajüleekat sünain müin aka saaʼin siruma. Talatüsü naaʼin Jeʼwaa sutuma tü naainjakat na israeliitakana. Shiyaleraapa tü sirumakat, nayaawata aaʼu na israeliitakana noʼunajanain. Natsajüin tü piichi aʼwaajüleekat jee oʼunushii naya süchiirua tü sirumakat.