Indu Moses tja ri kOndundu Sinai, Jehova we mu raera kutja nga tunge ondanda yapeke, ndji mai isanewa ondanda yomerikotameneno, Ovaisrael pu mave utu okurikotamena ku Ye. Owo mave yenene okutjinda ondanda yomerikotameneno otja pu mave kayenda.

Jehova wa tja: ‘Raera ovandu kutja ve yandje pu mave yenene okuvatera okutunga ondanda yomerikotameneno.’ Ovaisrael va yandja ongoldo, osilveri, ongoporo, nomawe omahuze nourenga womosengo. Owo wina va yandja omainya wonḓu, otupera otuheze, omikova vyovinamuinyo noviṋa ovingi vyarwe. Owo va yandja oviṋa ovingi tjinene ngandu Moses tja tja: ‘Opuwo vya yenene amu eta ko oviṋa rukwao.’

Ovarumendu novakazendu mba ri nondjiviro ombwa va vatera okutunga ondanda yomerikotameneno. Jehova we ve pa ounongo mbu ri wo koviungura. Tjiva aave ungura nokuwoza omainya nomarapi, nu varwe aave ungura omawe, nokuungura nongoldo poo omiti mbya hongwa.

Ovandu va ungura ondanda yomerikotameneno otja Jehova pe ve raera. Owo va ungura erapi ewa tjinene ndaari haṋa ondanda yomerikotameneno motupa tuvari, omunda imbwi Omuyapuke na imbwi Omuyapukeyapuke. Omunda imbwi Omuyapukeyapuke mwa ri otjipwikiro tjomerikutiropamwe, tji tja ungurirwe pomiti nongoldo. Omunda imbwi Omuyapuke mwa ri otjikurameno tjomarambe tji tja ungurwa pongoldo, otjitihe notjipunguhiro tjokuningiririsira po ozombunguhiro. Morupanda rondanda yomerikotameneno mwa ri otjiyaha tjongoporo notjipunguhiro otjinene. Otjipwikiro tjomerikutiropamwe aatji  zemburukisa Ovaisrael ohunga nomakwizikiro wawo wokukara nonḓuviro ku Jehova. Mo tjiwa kutja omerikutiropamwe otjikwaye? Indwi oruyano rwapeke.

Jehova wa toorora Aron novazandu ve kutja ve ungure pondanda yomerikotameneno otjovapristeri. Owo aave sokuiṱakamisa nokutjitira po ozombunguhiro ku Jehova. Omupristeri otjiuru porwe, Aron, ongwaa yandjerwa okuhita mOtjouyapukeyapuke. Eye aa hiti mo rumwe mombura okutjita ombunguhiro komauvi we nowoveṱunḓu re nomauvi wotjiwaṋa atjihe tjaIsrael.

Ovaisrael va mana ondanda yomerikotameneno ombura imwe kombunda yokuza moEngipte. Nambano owo ve noruveze pu mave rikotamene ku Jehova.

Jehova wa raisa kutja wa ri nohange nondanda yomerikotameneno na munikisa otjikamba kombanda yayo. Aruhe otjikamba tji tja munika kombanda yondanda yomerikotameneno, Ovaisreal aave tura mbo. Posiya otjikamba tji tja zu po, aave tjiwa kutja nambano oruveze rokukayenda. Owo aave haṋa ondanda nave kongorere otjikamba.