Eshi Moses a li komhunda yaSinai, Jehova okwe mu lombwela kutya na tunge otenda ye likalekelwa hai ifanwa etwali, omo Ovaisrael va li tava dulu okulongela Jehova. Ovaisrael ova li hava humbata po etwali ngeenge tava tembuka.

Jehova okwa ti: ‘Lombwela ovanhu va yandje osho ve na opo shi kwafele okutungifa etwali.’ Ovaisrael ova li va yandja oshingoli, oshisilveri, ongopolo, omamanya ondilo nosho yo oikwaivela. Ova li yo va yandja olududi leedi, oliina, oipa yoinamwenyo nosho yo oinima imwe vali ihapu. Ova li va yandja oinima ihapu fiyo osheshi Moses e va lombwela kutya: ‘Oinima oya wana, inamu eta vali.’

Ovalumenhu novakainhu vahapu ve na ounghulungu ova li va kwafela mokutunga etwali. Jehova okwa li e va kwafela va kale ve na ounongo opo va longe oilonga ya tya ngaho. Vamwe ova li va hodila eengodi, va ninga oiyata, vamwe ova li va honga omamanya, oiti, ofimbo vamwe va li tava longo oilonga oyo ya kwatela mo oshingoli.

Ovaisrael ova li va tunga etwali ngaashi naanaa Jehova a li e va lombwela. Ova li va ninga elapi liwa olo la li la tukula etwali moitukulwa ivali, hai ifanwa Ouyapuki nOuyapukielela. MOuyapukielela omwa li hamu kala oshikefa shehangano, osho osha li sha longwa noiti yomwoonde noshingoli. MOuyapuki omwa li oshikwatelwalamba shoshingoli, oshitaafula nosho yo oaltari yokuxwikila oitwimino. Moshihale omwa li hamu kala etemba lokulikoshela loshivela shitwima nosho yo oaltari ya kula. Oshikefa shehangano osha li hashi dimbulukifa Ovaisrael shi na sha  neudaneko olo va ninga kutya otava ka dulika kuJehova. Mbela ou shii kutya ehangano oshike? Olo eudaneko le likalekelwa.

Jehova okwa li a hoolola Aron novanamati vaye va longe metwali ve li ovapristeri. Ova li ve na okufila oshisho etwali nokuyambela Jehova omayambo. Omupristeri omukulunhu, Aron, oye aeke a li a pitikwa okuya mOuyapukielela. Okwa li ashike ha i mo lumwe momudo opo a ka yambe omayambo omolwomatimba aye, ovaneumbo laye nosho yo oshiwana ashishe shaIsrael.

Ovaisrael ova li va mana okutunga etwali konima yomudo umwe eshi va dja muEgipti. Okudja opo, ova li ve na onhele yokulongela Jehova.

Jehova okwa li a yadifa etwali noshinge shaye nokwa li a tula oshilemo kombada yalo. Shimha oshilemo sha li kombada yetwali, Ovaisrael kava li hava tembuka. Ashike ngeenge oshilemo osha di ko, ova li hava kala ve shii kutya ove na okutembuka. Ova li hava humbata po etwali ndele tava landula oshilemo.