មេរៀនទី២៥
ត្រសាលសម្រាប់គោរពប្រណិប័តន៍ព្រះ
ពេលម៉ូសេនៅលើភ្នំស៊ីណាយ ព្រះយេហូវ៉ាបានបង្គាប់គាត់ឲ្យសង់រោងពិសេសមួយហៅថា ត្រសាលជំនុំ។ ត្រសាលនោះសម្រាប់ជនជាតិអ៊ីស្រាអែលប្រើជាកន្លែងគោរពប្រណិប័តន៍លោក។ រាល់ដងដែលពួកគេរើជំរំ ពួកគេតែងយកត្រសាលនោះទៅជាមួយ។
ព្រះយេហូវ៉ាប្រាប់ម៉ូសេថា៖ ‹ចូរប្រាប់បណ្ដាជនឲ្យធ្វើវិភាគទានតាមលទ្ធភាព ដើម្បីជួយសង់ត្រសាល›។ ម្ល៉ោះហើយ ជនជាតិអ៊ីស្រាអែលបានឲ្យប្រាក់ មាស ស្ពាន់ ត្បូងមានតម្លៃ និងគ្រឿងអលង្ការផ្សេងៗ។ ពួកគេថែមទាំងឲ្យអំបោះ ក្រណាត់លេនីន ស្បែកសត្វ និងរបស់ជាច្រើនទៀត។ ពួកគេមានចិត្តទូលាយឲ្យច្រើនដល់ម្ល៉េះ រហូតដល់ម៉ូសេប្រាប់ថា៖ ‹យើងមានគ្រប់គ្រាន់ហើយ! មិនត្រូវយកមកថែមទៀតទេ›។
បុរសនិងស្ត្រីដែលមានជំនាញផ្សេងៗ បានចូលរួមសាងសង់ត្រសាល។ ព្រះយេហូវ៉ាបានឲ្យពួកគេមានប្រាជ្ញាធ្វើកិច្ចការនេះ។ អ្នកខ្លះវេញអំបោះ ត្បាញក្រណាត់ ឬដេរប៉ាក់។ ចំណែកអ្នកខ្លះទៀត ដាំត្បូងលាយជាមួយមាស ឬឆ្លាក់ឈើជាដើម។
ពួកគេសង់ត្រសាលដូចអ្វីដែលព្រះយេហូវ៉ាបានបង្គាប់។ ពួកគេធ្វើវាំងននដ៏ស្អាតមួយ ដើម្បីខណ្ឌចែកត្រសាលជាពីរផ្នែក។ ផ្នែកមួយហៅថា បន្ទប់បរិសុទ្ធ ហើយផ្នែកមួយទៀតហៅថា បន្ទប់បរិសុទ្ធបំផុត។ ក្នុងបន្ទប់បរិសុទ្ធបំផុត មានហឹបនៃកិច្ចព្រមព្រៀង ដែលធ្វើពីឈើអាកាស្យានិងមាស។ រីឯក្នុងបន្ទប់បរិសុទ្ធ មានជើងចង្កៀងមាស មានតុ និងទីបូជាសម្រាប់ដុតគ្រឿងក្រអូប។ ចំណែកក្នុងទីធ្លាត្រសាលវិញ មានអាងស្ពាន់ និងទីបូជាធំមួយ។ ហឹបនៃកិច្ចព្រមព្រៀង គឺរំលឹកជនជាតិអ៊ីស្រាអែលថា ពួកគេបានធ្វើសេចក្ដីសន្យាពិសេសមួយថា ពួកគេស្ដាប់បង្គាប់ព្រះយេហូវ៉ា។
ព្រះយេហូវ៉ាបានជ្រើសរើសអេរ៉ុននិងកូនប្រុសៗរបស់គាត់ ឲ្យធ្វើជាសង្ឃនៅឯត្រសាល។ ពួកគេមានភារកិច្ចមើលថែរក្សាត្រសាល និងជូនគ្រឿងបូជាដល់ព្រះយេហូវ៉ា។ មានតែអេរ៉ុនដែលជាសម្ដេចសង្ឃប៉ុណ្ណោះ អាចចូលទៅក្នុងបន្ទប់បរិសុទ្ធបំផុត។ មួយឆ្នាំម្ដង គាត់ចូលទៅក្នុងបន្ទប់នោះ ដើម្បីជូនគ្រឿងបូជាសម្រាប់ភាពខុសឆ្គងរបស់គាត់ ក្រុមគ្រួសារគាត់ និងជនជាតិអ៊ីស្រាអែលទាំងមូល។
មួយឆ្នាំបន្ទាប់ពីចាកចេញពីស្រុកអេហ្ស៊ីប ជនជាតិអ៊ីស្រាអែលបានសង់ត្រសាលរួចរាល់។ ឥឡូវ ពួកគេមានកន្លែងគោរពប្រណិប័តន៍ព្រះយេហូវ៉ា។
ព្រះយេហូវ៉ាបានធ្វើឲ្យត្រសាលពេញដោយសិរីរុងរឿងរបស់លោក ទាំងធ្វើឲ្យពពកលេចពីលើត្រសាលនោះផង។ ដរាបណាពពកនៅលើត្រសាល ដរាបនោះជនជាតិអ៊ីស្រាអែលមិនរើជំរំទេ។ ប៉ុន្តែ ពេលពពកឡើងផុតពីត្រសាល នោះជាសញ្ញាថាពួកគេត្រូវរើជំរំ។ រួចមក ពួកគេធ្វើដំណើរតាមពពក ដោយនាំយកត្រសាលទៅជាមួយដែរ។
«រួចមក ខ្ញុំឮសំឡេងមួយបន្លឺយ៉ាងខ្លាំងចេញពីបល្ល័ង្កមកថា៖ ‹មើល! ត្រសាលរបស់ព្រះនៅជាមួយនឹងមនុស្សជាតិ ហើយលោកនឹងអាស្រ័យនៅជាមួយនឹងពួកគេ ឯពួកគេនឹងធ្វើជារាស្ដ្ររបស់លោក។ ព្រះនឹងនៅជាមួយនឹងពួកគេដោយខ្លួនលោកផ្ទាល់›»។—ការបើកបង្ហាញ ២១:៣